عمران خان احتجاج کی کال دیں فورس کا استعمال کروں گا: وزیراعلیٰ خیبر پختونخوا

پاکستان کے صوبہ خیبر پختونخوا کے وزیراعلیٰ محمود خان نے کہا ہے کہ جب عمران خان دوبارہ لانگ مارچ کا اعلان کریں گے تو اپنے صوبے کی فورس استعمال کریں گے۔

پشاور میں پیر کو وکلا کنونشن سے خطاب میں وزیراعلیٰ محمود خان کا کہنا تھا کہ ’آج میں نے اپنی لیگل ٹیم کو بلایا تھا اور میں نے ان سے مشاورت کی جو خیبر پختونخوا کی حکومت اور عوام کے ساتھ جو اس امپورٹڈ اور نااہل حکومت نے کیا ہے اس کا بدلہ ہم ضرور لیں گے۔‘

انہوں نے اعلان کیا کہ وہ وزیراعظم شہباز شریف کی حکومت کے خلاف سپریم کورٹ جارہے ہیں اور وہ وزیر داخلہ رانا ثنااللہ کے خلاف مقدمات درج کروائیں گے۔

محمود خان نے پی ٹی آئی کے لانگ مارچ کا حوالہ دیتے ہوئے کہا کہ ’اس وقت تو میں ایک پرامن جلوس میں گیا تھا، خان صاحب دوبارہ کال دیں گے تو میں بتاؤں گا کہ جو خیبر پختونخوا کی فورس ہے میں وہ استعمال کروں گا۔‘

’ہم نہیں چھوڑیں گے انہیں، کسی صورت نہیں چھوڑیں گے انہیں۔‘

واضح رہے 25 مئی کو پاکستان تحریک انصاف (پی ٹی آئی) کے چیئرمین عمران خان لانگ مارچ کے ساتھ پشاور سے اسلام آباد آئے تھے اور اس موقع پر ان کی پارٹی کے کارکنان اور پولیس کے درمیان پاکستان کے متعدد شہروں میں جھڑپیں ہوئی تھیں جس میں کارکنان اور پولیس اہلکار زخمی ہوئے تھے۔

وزیراعلیٰ خیبر پختونخوا کے اس بیان کو سوشل میڈیا صارفین پاکستان کے دارالحکومت اسلام آباد پر ’مسلح حملے‘ کی دھمکی قرار دے رہے ہیں۔

افتخار حسین نامی صارف نے وزیر اعلیٰ محمود خان کی تقریر پر تبصرہ کرتے ہوئے سوال کیا کہ ’کیا ان کا یہ بیان بغاوت کے زمرے میں نہیں آتا؟‘

محسن خان نامی صارف نے نے لکھا کہ خیبر پختونخوا کے وزیر اعلیٰ سرکاری وسائل کا بے دریغ استعمال کرنے کی دھمکی دے رہے ہیں اور عدلیہ کو ان کے خلاف سوموٹو نوٹس لینا چاہیے۔

فاروق سومرو نامی صارف نے ایک ٹویٹ میں لکھا کہ ’عمران کہہ رہے ہیں اس مرتبہ تیاری کے ساتھ اسلام آباد جاؤں گا، شہباز گل کہہ رہے ہیں عسکری ونگ بنائیں گے، کے پی کے وزیراعلیٰ کہہ رہے ہیں فورس ساتھ لے جائیں گے، اور یہ سب کرنے کے لیے ان کو سپریم کورٹ کا تحفظ چاہیے، یہ ہو کیا رہا ہے؟‘

واضح رہے سابق وزیر اعظم عمران خان نے اعلیٰ عدلیہ سے متعدد بار اپیل کرچکے ہیں کہ انہیں پرامن احتجاج کا حق دیا جائے اور ان کے خلاف حکومت کو طاقت کے استعمال سے روکا جائے۔