تین دن میں چھ ہزار سے زائد عمرہ ویزے جاری: وزارت حج

سعودی وزارت حج و عمرہ  کا کہنا ہے کہ گزشتہ ماہ کے دوسرے ہفتے سے عمرہ ویزوں کے لیے رجسٹریشن کا آغاز کیا گیا تھا جس کے تحت اب تک 20 ہزارسے زائد عمرہ ویزے جاری  کیے جا چکے ہیں۔

بیرون مملکت سے آنے والے زائرین کو گزشتہ تین روز کے اندرچھ ہزار سے زائد عمرہ ویزے جاری کیے گئے۔

عاجل نیوز کے مطابق وزارت حج وعمرہ دیگر متعلقہ اداروں کے تعاون سے عمرہ زائرین کو مختلف سہولتوں کی فراہمی کو یقینی بنا رہی ہے۔

 وزارت حج و عمرہ کے مطابق بیرون مملکت سے عمرہ زائرین کو سرکاری ویب سائٹ کے ذریعے ویزہ حاصل  کرنے، عمرہ پیکیج خریدنے اور پیکیج کی رقم آن لائن ادا کرنے کی سہولت فراہم کی جا رہی ہے۔

سرکاری ویب سائٹ پر زائر عمرہ ویزہ کی درخواست پیش کرسکتا ہے۔ آن لائن عمرہ ویزہ فارم بھرنے کی سہولت بھی فراہم کی گئی ہے۔ رجسٹرڈ ای پلیٹ فارم کے ذریعے بیرون مملکت سے عمرے کے لیے آنے والے اپنے لیے مناسب پیکیج  کا انتخاب بھی خود کرسکتے ہیں۔  

اعتمرنا ایپ کے ذریعے عمرہ کی ادائیگی کے لیے دن اور وقت کا تعین کیا جا سکتا ہے۔ عمرہ ویزہ ملنے پر مسجد نبوی شریف کی زیارت کا وقت بھی متعین کیا جا سکتا ہے۔ یہ سب کچھ 24 گھنٹے آن لائن ممکن ہو گیا ہے۔ 

عمرہ زائر کے لیے آنے جانے کا ٹکٹ، انشورنس سکیم اور مملکت میں رجسٹرڈ عمرہ کمپنی سے فیلڈ سروس پیکیج، ٹرانسپورٹ اور رہائش کی بکنگ کرانا ضروری ہے۔