سعودی عرب میں سکول کھل گئے، 50 لاکھ سے زیادہ طلبہ کی واپسی

سعودی عرب میں اتوار 28 اگست سے تمام سکولوں میں نئے تعلیمی سال کا آغاز ہو گیا۔

مملکت بھر کے 33 ہزار500 سکولوں میں 50 لاکھ سے زیادہ طلبہ کی واپسی ہوئی ہے۔ 

یاد رہے کہ سعودی وزارت تعلیم نے کہا تھا کہ’ کورونا پابندیوں کے خاتمے کے بعد نئے تعلیمی سال کے دوران مملکت میں تمام نجی اور پرائیویٹ سکول باقاعدہ کھلیں گے۔ طلبہ اور اساتذہ کو حاضری دینا ہوگی اور آن لائن تعلیم نہیں ہوگی‘۔ 

وزارت نے ٹوئٹر کے اپنے اکاونٹ پر طلبہ کی تصاویر شیئر کیں اور لکھا کہ ’مملکت کے مختلف ریجنرز اور گورنریٹس میں طلبہ نے خوشی اور سنجیدگی کے ساتھ  تعلیمی سال کے پہلے دن کی شروعات کی ہیں‘۔

اس سے قبل وزارت تعلیم  نے بیان میں کہا تھا کہ ’گزشتہ تعلیمی سال کی طرح نئے تعلیمی سال میں تین سمسٹر ہوں گے‘۔

واضح رہے کہ وزارت تعلیم نے ہائی سکول کے طلبہ کے لیے لیبر مارکیٹ سے ہم آہنگ خصوصی نصاب بھی تیار کیا ہے۔