امریکی صدر کی سیاسی مخالفین کے خلاف ایف 15 کے استعمال کی ’دھمکی‘؟

امریکی صدر جو بائیڈن نے پینسلوینیا میں اپنے خطاب کے دوران اس عزم کا اظہار کیا کہ وہ ملک میں عام لوگوں پر اسلحہ رکھنے پر پابندی عائد کرنا چاہتے ہیں۔

بدھ کو امریکی ریاست پیسلوینیا میں اپنے خطاب کے دوران صدر بائیڈن نے ’گن کنٹرول‘ پر بات کرتے ہوئے کہا کہ ’میں وضاحت کرنا چاہتا ہوں کہ یہ کسی کا اسلحہ چھیننے کی بات نہیں بلکہ جو ذمہ داری سے اسلحہ رکھتے ہیں ہمیں انہیں مثال بناکر پیش کرنا چاہیے۔‘

امریکی صدر نے کہا کہ ان کا منصوبہ ہے کہ ملک میں تشدد کو کم کیا جائے اور ان کی جانب سے لایا گیا ’سیفر کمیونٹی ایکٹ‘ اسی فیصلے کی کڑی تھی۔

انہوں نے مثال دیتے ہوئے کہا کہ صرف 2021 میں بندوق کی گولیوں سے مرنے والوں کی تعداد امریکہ میں 48 ہزار سے زیادہ تھی اور 26 ہزار سے زائد لوگوں نے اسلحے کا استعمال کرتے ہوئے خودکشیاں کیں۔

امریکہ میں دائیں بازو کی جماعتوں کے حامی صدر بائیڈن کے ’گن کنٹرول‘ قوانین کے مخالف رہے ہیں اور انہی سے متعلق صدر بائیڈن کے کچھ جملے سوشل میڈیا پر زیر بحث ہیں اور ایف 15 ٹوئٹر پر ٹاپ ٹرینڈز میں سے ایک ہے۔

اپنی تقریر میں امریکی صدر نے ’گن رائٹس‘ کے حامی گروپ ’نیشنل رائفل ایسوسی ایشن‘ پر بھی تنقید کی اور کہا کہ ’ریپبلکن پارٹی‘ کی اکثریت اس گروپ سے ڈرتی ہے اس لیے وہ ’گن کنٹرول‘ قوانین کے مخالف ہیں۔

بائیڈن نے دائیں بازو کی حامیوں پر طنز کرتے ہوئے کہا کہ ’دائیں بازو کے ان بہادر لوگوں کے لیے جو کہتے ہیں کہ امریکہ کو آزاد رکھنا ہے اور محفوظ رکھنا ہے، میں ان کو کہنا چاہتا ہوں کہ اگر آپ کو ملک کے خلاف لڑنا ہے تو آپ کو ایف 15 کی ضرورت ہے۔‘

’آپ کو بندوق سے بڑی چیز کی ضرورت ہے۔ میں مذاق نہیں کر رہا بلکہ آپ اس بارے میں سوچیں۔‘

خیال رہے کہ ایف 15 امریکی لڑاکا طیارہ ہے۔ سوشل میڈیا پر بائیڈن کے ناقدین ان کے اس بیان کو دھمکی آمیز قرار دے رہے ہیں اور الزام لگا رہے ہیں کہ بائیڈن نے اپنے مخالفین کے خلاف جنگی طیارہ استعمال کرنے کی دھمکی دی ہے۔

ریپبلکن پارٹی کے رکن ڈیوڈ گگلیو نے اپنی ایک ٹویٹ میں لکھا ’سوچیے میڈیا کا ردعمل کیا ہوتا اگر ڈونلڈ ٹرمپ نے امریکی لوگوں کے خلاف ایف 15 استعمال کرنے کی دھمکی دی ہوتی۔‘

ایک اور سوشل میڈیا صارف نے صدر بائیڈن پر الزام لگایا کہ ’ایف 15 ایک لڑاکا طیارہ ہے، بندوق نہیں۔ یہ اپنے سیاسی مخالفین کے خلاف خطرناک فوجی قوت استعمال کرنے کی بات کر رہے ہیں۔‘

واضح رہے پچھلے سال فروری میں سابق صدر ڈونلڈ ٹرمپ کے حامیوں نے امریکی کانگریس میں گھس کر بائیڈن کو صدر بننے سے روکنے کی کوشش کی تھی۔ سابق صدر ٹرمپ پر یہ بھی الزام تھا کہ انہوں نے اقتدار کی منتقلی کو الیکشن میں ہار کی صورت میں طاقت سے روکنے کی کوشش کی۔

یہاں یہ بات بھی قابل ذکر ہے کہ موجودہ امریکی حکومت نے ٹرمپ کے اسلحے سے لیس حامیوں کو جمہوریت کے لیے خطرہ قرار دیا تھا۔