پاکستان کا 4500 افغان طلبہ کو تعلیمی وظائف دینے کا اعلان

سابق سفیر اور وزیراعظم کے معاون خصوصی اور افغان امور کے نمائندہ خصوصی محمد صادق نے کہا ہے کہ حکومت پاکستان اگلے سال افغانستان کے طلبہ کو مزید 45 سو تعلیمی وظائف فراہم کرے گی۔

پاکستان کی سرکاری خبر ایجنسی اے پی پی کے مطابق سنیچر کو محمد صادق نے افغانستان بین الوزارتی رابطہ سیل کے اجلاس میں کہا ’اس وقت چھ ہزار کے قریب افغان طلبہ پاکستان کی صف اول کی جامعات سے میڈیکل، انجینیئرنگ اور سوشل سائنسز سمیت مختلف شعبوں میں تعلیم حاصل کر رہے ہیں۔‘

واضح رہے کہ افغانستان کے وزیر صحت ڈاکٹر عباد کی قیادت میں ایک اعلٰی سطحی وفد نے پاکستانی حکام سے ملاقات کی ہے اور دونوں ملکوں کے تعلقات اور تعلیم اور صحت کے شعبے میں افغان شہریوں کے لیے پاکستان کی مدد پر تبادلہ خیال کیا ہے۔

ڈاکٹر عباد نے کہا کہ ’پاکستان افغانستان کو صحت کے شعبے میں ایک ارب روپے کی مالی معاونت فراہم کر رہا ہے اور افغانستان کے تین بڑے ہسپتالوں کو اپ گریڈ کر رہا ہے۔‘

’حکومت پاکستان تینوں ہسپتالوں کے عملے کو تنخواہیں فراہم کرے گی اور ان ہسپتالوں کی اپ گریڈیشن اس مالیاتی پیکیج میں شامل کی جائے گی جن میں کابل کا جناح ہسپتال، لوگر کا نائب امین ہسپتال اور جلال آباد کا نشتر ہسپتال شامل ہے۔‘

افغان وزیر صحت ڈاکٹر عباد نے اس مشکل گھڑی میں حکومت پاکستان کی کوششوں اور تعاون کو سراہا اور شکریہ ادا کیا۔

انہوں نے کہا کہ افغانستان میں امن اور ترقی کے لیے پاکستان کا کردار اہم ہے۔

ڈاکٹر عباد کا کہنا تھا کہ افغانستان پاکستانی سرمایہ کاروں کے لیے بہترین جگہ ہے اور تعلیم اور صحت کے شعبوں میں سازگار دوطرفہ تعلقات کے لیے تمام غیرضروری مشکلات کو بہت جلد دور کیا جائے گا۔

اجلاس میں پاکستان میں افغانستان کے سفیر محمد شعیب، افغانستان کی وزارت صحت کے سینیئر حکام اور پاکستانی حکام نے شرکت کی۔