ٹیم سے ڈراپ ہونے کے باوجود حسن علی جذبے سے سرشار

پاکستان کرکٹ ٹیم کے فاسٹ بولر حسن علی ٹیسٹ ٹیم سے باہر کیے جانے کے باوجود جذبے سے سرشار نظر آرہے ہیں۔
انگلینڈ کے خلاف ٹیسٹ سیریز کے لیے حسن علی کی سکواڈ میں شمولیت غیر یقینی تھی اور  توقع کے مطابق پیر کے روز جب ٹیم کا اعلان کیا گیا تو اس میں حسن علی کا نام شامل نہیں تھا۔

حسن علی اسی سلسلے میں سماجی رابطوں کی ویب سائٹ ٹوئٹر پر اپنی ٹویٹ میں لکھتے ہیں کہ ’میرے تمام ساتھی کھلاڑیوں کو مبارک ہو جو انگلینڈ کے خلاف ٹیسٹ سیریز کے لیے ٹیم میں شامل ہوئے ہیں۔‘

’انشاللہ میں جاری ڈومیسٹک کرکٹ میں محنت کروں گا اور قومی ٹیم میں واپس آؤں گا، ہیش ٹیگ پاکستان زندہ باد۔‘
حسن علی کو ٹیسٹ ٹیم سے غیر معیاری کارکردگی اور آؤٹ آف فارم ہونے کے باعث ڈراپ کیا گیا ہے۔
حسن علی نے پاکستان کی جانب سے آخری ٹیسٹ میچ جولائی میں سری لنکا کے خلاف گال میں کھیلا تھا جس میں وہ کوئی وکٹ حاصل کرنے میں ناکام رہے تھے۔
حسن علی نے قومی ٹیم کی جانب سے اب تک 21 ٹیسٹ میچز کھیلے ہیں جس میں انہوں نے 24 کی اوسط سے 77 کھلاڑیوں کو آؤٹ کیا ہے۔
28 سالہ فاسٹ بولر حالیہ آج کل ڈومیسٹک ٹورنامنٹ قائداعظم ٹرافی میں سدرن پنجاب کی قیادت کررہے ہیں۔

قائداعظم ٹرافی میں حسن علی نے سدرن پنجاب کی جانب سے نمائندگی کرتے ہوئے 6 میچز میں اب تک 11 وکٹیں حاصل کی ہیں جبکہ ان کی اوسط 43 رنز کی ہے۔
انگلیںڈ کے خلاف ٹیسٹ سیریز کے لیے حسن علی کے علاوہ لیگ سپنر یاسر شاہ اور بیٹر فواد عالم کو بھی ڈراپ کیا گیا ہے۔
انگلینڈ کے خلاف ٹیسٹ سیریز کے لیے پاکستان ٹیم کا سکواڈ:
بابراعظم (کپتان)، محمد رضوان، عبداللہ شفیق، ابرار احمد، اظہر علی، فہیم اشرف، حارث رؤف، محمد وسیم جونیئر اور امام الحق پاکستانی سکواڈ میں شامل ہیں۔

محمد علی، محمد نواز، نسیم شاہ، نعمان علی، سلمان علی آغا، سرفراز احمد، سعود شکیل، شان مسعود اور زاہد محمود کو بھی سکواڈ کا حصہ ہیں۔
حسن علی کی اس ٹویٹ پر صارفین اور ساتھی کھلاڑیوں کی جانب سے ان کے لیے تعریفی تبصرے دیکھنے میں آرہے ہیں۔
لیگ سپنر شاداب خان لکھتے ہیں کہ ’اسی وجہ سے آپ کی چیمپیئنز والی سوچ ہے، آپ ہمیشہ ٹیم کو سپورٹ کرتے ہیں اور محنت کرتے ہیں۔‘

ایمان لکھتی ہیں کہ ’آپ ایک سچ میں مشعل راہ ہیں، ہمیشہ آپ کے لیے آواز بلند کی ہے، حسن بھائی آپ کے لیے نیک تمنائیں۔‘

مریم کہتی ہیں کہ ’آپ کتنے سویٹ انسان ہیں، امید کرتے ہیں کہ آپ جلد واپس آئیں گے اور مزید مضبوط ہو کر واپس آئیں گے اور ہم جنریٹر والا جشن دیکھیں گے۔‘

پاکستان کی خاتون کرکٹر فاطمہ ثنا نے لکھا کہ ’آپ ایک مشعل راہ ہیں، حسن علی بھائی چلتے رہیں، آپ کا وقت آئے گا۔‘

پی ایس ایل میمز نامی ایک ہینڈل نے لکھا کہ ’ٹی وی شوز پر بیٹھ کر کوئی پریشانی اور افراتفری نہیں مچائی، ٹیم میں شامل نہیں ہوئے لیکن مثبت رویہ دکھایا، یہ حسن علی ہیں۔‘