فٹ بال ورلڈ کپ: ’سعودی عرب کا میسی کے خلاف جیتنا قدرت کا نظام ہے‘

فٹ بال ورلڈ کپ کے گروپ میچ میں سعودی عرب نے ارجنٹائن کو ایک کے مقابلے میں دو گول سے شکست دے کر میگا ایونٹ کا پہلا اپ سیٹ کر دکھایا ہے۔

قطر کے دارالحکومت دوحہ کے لوسیل سٹیڈیم میں کھیلنے جانے والے میچ میں ارجنٹائن کی طرف سے پہلے گول لیونل میسی نے کیا لیکن اس کے بعد سعودی عرب کے نے یکے بعد دیگرے دو گول کر کے میچ میں فیصلہ کن برتری حاصل کرلی جو میچ کے آخری لمحات تک برقرار رہی۔

سعودی عرب سے پہلا گول میچ کے 48 ویں منٹ میں صالح الشھری نے کیا جبکہ دوسرا گول محض پانچ منٹ بعد سالم الدوسیری نے کیا۔

ٹیم کی جیت پر پاکستان میں سعودی سفارتخانہ بھی خوشی سے نہال نظر آیا۔ ایک ٹویٹ میں سعودی سفارتخانے نے لکھا ’آج ہماری ٹیم کے راستے سے ہٹ جاؤ۔ سعودی عقاب آسمان میں اونچی پرواز کرتے ہیں۔‘

سعودی عرب کی ٹیم اس وقت فٹ بال کی عالمی رینکنگ میں 51 ویں جبکہ ارجنٹائن دوسرے نمبر پر ہے۔

سعودی عرب کی جیت پر سوشل میڈیا پر بھی صارفین جشن مناتے ہوئے نظر آرہے ہیں اور کچھ صارفین اس اپ سیٹ پر حیران ہیں۔

ایک سوشل میڈیا صارف نے لکھا کہ ’سعودی عرب کا میسی کے خلاف جیتنا قدرت کا نظام ہے۔‘

ارجنٹائن کی ٹیم میچ کے دوران سعودی عرب کے خلاف دوسرا گول کرنے کے لیے تابڑ توڑ حملے کرتی نظر آئی لیکن سعودی گول کیپر محمد الاویس گول پوسٹ کے سامنے آہنی دیوار ثابت ہوئے۔

پاکستانی سپورٹس جرنلسٹ فیصان لاکھانی نے اپنی ایک ٹویٹ میں لکھا ’آج کے میچ کے اصل ہیرو سعودی گول کیپر محمد الاویس ہیں۔‘

سوشل میڈیا پر موجود افراد نہ صرف سعودی کھلاڑیوں کی کارکردگی سے محظوظ ہوئے بلکہ عربی کمنٹری بھی انہیں نہایت پسند آئی۔

پاکستانی کوچ محمد یوسف نے بھی ایک ٹویٹ میں سعودی عرب کو جیت پر مبارکباد دی اور عربی کمنٹری کو بھی سراہا۔

سعودی وزیر برائے کھیل شہزادہ عبدالعزیز بن ترکی الفیصل بھی گراؤنڈ میں بیٹھے اپنی ٹیم کی جیت پر خوشیاں مناتے ہوئے نظر آئے۔

سعودی عرب میں یہ میچ شائقین نے سٹیڈیمز میں بڑی سکرینوں پر دیکھا اور جیت کے بعد جشن مناتے ہوئے نظر آئے۔

خیال رہے ارجنٹائن آج کے میچ سے قبل 36 میچوں میں ناقابل شکست رہا تھا اور آج سعودی عرب نے ان کی جیت کے اس سلسلے کو روک دیا ہے۔