’عزتِ نفس کا تحفظ‘، آرٹیکل 14 صرف طاقتور کے لیے ہے: عمران خان

پاکستان تحریک انصاف (پی ٹی آئی) کے چیئرمین عمران خان نے کہا ہے کہ کیا آئین کے آرٹیکل 14 کا اطلاق صرف طاقتور افراد کے لیے ہوتا ہے۔‘

عمران خان نے پیر کو  تحریک انصاف کے گرفتار سینیٹر اعظم خان سواتی کا حوالہ دیتے ہوئے اپنے ٹویٹ میں لکھا کہ ’آئین کا آرٹیکل 14 ’فرد کی عزت نفس کے تحفظ‘ سے متعلق ہے۔‘

’میرا سپریم کورٹ کے معزز ججوں سے سوال ہے کہ کیا آئین کی اس شق کا اطلاق صرف ریاست کے طاقتور افراد پر ہوتا ہے اور کیا دیگر افراد کے بنیادی انسانی شرف کو کوئی تحفظ حاصل نہیں ہے۔‘

انہوں نے مزید لکھا کہ ’سینیٹر اعظم سواتی کو برہنہ کر کے تشدد کا نشانہ بنایا گیا۔ ان کی اہلیہ کو غی قانونی ویڈیو بھیج  کر ان کی تذلیل کی گئی۔ وہ کئی ہفتوں تک سپریم کورٹ سے انصاف مانگتے رہے۔‘

’پھر اس کے بعد انہوں نے قابل جواز ناراضی اور غصے کا اظہار کیا تو انہیں جیل میں ڈال دیا گیا اور پورے پاکستان میں ان کے خلاف 15 مقدمات درج کر دیے گئے۔‘

خیال رہے کہ سینیٹر اعظم خان سواتی کو اتوار کی صبح فیڈرل انویسٹی گیشن ایجنسی(ایف آئی اے) کے سائبر کرائمز ونگ نے اسلام آباد سے گرفتار کر لیا تھا۔

اعظم سواتی کو ’متنازع ٹویٹس‘ کے کیس میں اتوار ہی کو ڈیوٹی میجسٹریٹ کی عدالت پیش کیا گیا جہاں عدالت نے سماعت کے بعد انہیں دو روزہ جسمانی ریمانڈ پر ایف آئی اے کے حوالے کر دیا تھا۔

اعظم سواتی کے خلاف کراچی سمیت ملک کے مختلف شہریوں میں متعدد ایف آئی آرز بھی درج ہوئی ہیں۔