فیفا: جیتنے والی اور رنر اپ ٹیم کو کتنی انعامی رقم ملے گی؟

قطر میں جاری فٹ بال ورلڈ کپ اپنے اختتامی مراحل میں داخل ہوچکا ہے اور لوکا موڈرچ کی ٹیم کروشیا کو شکست دے کر لیونل میسی کی ارجنٹینا میگا ایونٹ کے فائنل میں جگہ بنا چکی ہے۔

ورلڈ کپ کا فائنل کھیلنے والی دوسری ٹیم کون ہوگی اس کا فیصلہ بدھ کی رات کو دفاعی چیمپیئن فرانس اور مراکش کے میچ بعد ہو جائے گا۔

یہاں سوال یہ ہے کہ ورلڈ کپ جیتنے اور فائنل میں شکست سے دوچار ہونے والی ٹیموں کو کتنی انعامی رقم ملے گی؟

فٹ بال کی کوریج کرنے والی ویب سائٹ ’گول‘ کے مطابق ورلڈ کپ جیتنے والی ٹیم کو چار کروڑ 20 لاکھ ڈالرز انعام کے طور پر ملیں گے جبکہ فائنل میں ہارنے والی یعنی میگا ایونٹ میں نمبر 2 ٹیم کو تین کروڑ ڈالرز دیے جائیں گے۔

فیفا نے فٹ بال ورلڈ کپ میں پہنچنے والی ہر ٹیم کے لیے کچھ رقم رکھی ہے۔ اس ٹورنامنٹ میں تیسرے نمبر پر رہنے والی فٹ بال ٹیم کو دو کروڑ 70 لاکھ ڈالر، چوتھے نمبر کی ٹیم کو دو کروڑ 50 لاکھ اور کوراٹر فائنل میں پہنچنے والی ہر ٹیم کو ایک کروڑ 70 لاکھ ڈالر دیے جائیں گے۔

دوسری جانب ورلڈ کپ میں ’راؤنڈ آف 16‘ میں پہنچنے والی ہر ٹیم کو ایک کروڑ 30 لاکھ دیے جائیں گے جبکہ ورلڈ میں کوالیفائی کرنے والی ہر ٹیم کو 90 لاکھ ڈالر دیے جائیں گے۔