کراچی ٹیسٹ: تیسرے دن کے اختتام پر نیوزی لینڈ کے 440 رنز

پاکستان اور نیوزی لینڈ کے درمیان دو ٹیسٹ میچوں کی سیریز کے پہلے میچ میں نیوزی لینڈ نے کھیل کے تیسرے دن کے اختتام پر چھ وکٹوں کے نقصان پر 440 رنز بنائے ہیں اور اسے دو رنز کی برتری حاصل ہے۔

کین ولیمسن 105 اور اش سوڈھی ایک رنز کے ساتھ ناٹ آؤٹ ہیں۔

بدھ کو کراچی میں کھیلے جانے والے میچ میں پاکستان کو مہمان ٹیم کے خلاف پہلی کامیابی اس وقت ملی جب نعمان علی نے ڈیون کونوے کو 92 رنز پر ایل بی ڈبلیو کیا۔

نیوزی لینڈ کے اوپنر ٹام لیتھم نے سنیچری سکور کی اور 113 رنز بنا کر ابرار احمد کی گیند پر کیچ آؤٹ ہوئے۔

ہنری نکولس اور کین ولیمسن کے درمیان 41 رنز کی شراکت داری بنی جس کے بعد نعمان علی نے ایک بار پھر گرین شرٹس کو بریک تھرو دلایا اور ہنری کو بولڈ کر دیا۔

چوتھے نمبر پر آنے والے ڈیرل مچل نے کین ولیمسن کے ساتھ مل کر سکور کو آگے بڑھایا۔ دونوں کے درمیان 65 رنز کی شراکت داری قائم ہوئی۔ تاہم مچل بدقسمتی سے اپنی نصف سینچری مکمل نہ کر سکے اور 42 رنز بنا کر ابرار احمد کی گیند پر سرفراز احمد کو کیچ تھما بیٹھے۔

پاکستان کا نوآموز بولنگ اٹیک کیوی بلے بازوں کو دباؤ میں لانے میں ناکام رہا اور مسلسل شراکت داریوں نے سکور کو رکنے نہ دیا۔

کین ولیمسن نے ایک اینڈ کو سنبھالے رکھا جبکہ وکٹ کیپر بلے باز ٹام بلینڈل کے ساتھ بھی 90 رنز کی پارٹنرشپ بنائی۔ لیکن ٹام بھی بدقسمت رہے اور 47 رنز بنا کر محمد وسیم کی گیند پر ایل بی ڈبلیو ہو گئے۔

اس دوران کین ولیمسن نے 206 گیندوں پر 11 چوکوں کی مدد سے اپنی شاندار سنیچری مکمل کی۔

نیوزی لینڈ کے چھٹے آؤٹ ہونے والے کھلاڑی مائیکل بریسویل تھے۔ انہیں چھ رنز پر ابرار احمد نے آؤٹ کیا۔

پاکستان کی ساری ٹیم پہلی اننگز میں 438 رنز بنا کر آؤٹ ہو گئی تھی جس کے جواب میں نیوزی لینڈ نے منگل کو دن کے اختتام پر بغیر کسی نقصان کے 165 رنز بنائے تھے۔

منگل کو دوسرے دن کے آغاز پر کپتان بابر اعظم بغیر کسی اضافی رنز کے 161 پر آؤٹ ہو گئے تھے۔ 7 ویں وکٹ نعمان علی کی گری جنہوں نے سات رنز بنائے جبکہ محمد وسیم 2 رنز پر آؤٹ ہوئے۔

پاکستان کی اننگز میں دوسری سنیچری آغا سلمان نے سکور کی جو 103 رنز پر آؤٹ ہوئے۔ 

پیر کو ٹیسٹ میچ میں ٹاس جیت کر پاکستان نے بیٹنگ کرتے ہوئے پہلے دن کے اختتام پر پانچ وکٹوں کے نقصان پر 317 رنز بنائے تھے۔

پہلے دن سرفراز احمد اور بابر اعظم  کے درمیان 196 رنز کی عمدہ شراکت داری کی وجہ سے پاکستان کی میچ میں پوزیشن مستحکم ہوئی۔ یہ پارٹنرشپ پہلے دن کے کھیل کے اختتام سے کچھ دیر پہلے سرفراز کے 86 رنز پر آؤٹ ہونے سے ختم ہوئی۔

ہلے دن  پاکستان کی بیٹنگ لائن ٹیم کو اچھا آغاز فراہم نہیں کر سکی اور 48 کے مجموعی سکور پر تین بلے باز آؤٹ ہو چکے تھے۔

پہلی وکٹ عبداللہ شفیق کی گری جو سات رنز بنا سکے جبکہ شان مسعود تین رنز پر آؤٹ ہو گئے۔ آؤٹ ہونے والے تیسرے بلے باز اوپنر امام الحق تھے جو 24 رنز بنا سکے۔ 

تین وکٹیں گرنے کے بعد کپتان بابر اعظم اور سعود شکیل کے درمیان 62 رنز کی شراکت داری اس وقت ختم ہوئی جب سعود شکیل 22 رنز بنا کر کیچ آؤٹ ہو گئے۔

پانچویں وکٹ 306 کے مجموعی سکور پر سرفراز احمد کی گری جنھوں نے 86 رنز بنائے۔ دونوں ٹیموں کے درمیان پہلے ٹیسٹ میچ کے لیے پاکستان نے ٹیم میں تبدیلیاں کی ہیں اور سابق کپتان سرفراز احمد اور فاسٹ بولر حمزہ کو ٹیم میں شامل کیا گیا ہے۔

ان دونوں کے علاوہ کپتان بابر اعظم، امام الحق، عبداللہ شفیق، شان مسعود، سعود شکیل، آغا سلمان، نعمان علی، محمد وسیم اور ابرار احمد بھی ٹیم کا حصہ ہیں۔

دوسری جانب نیوزی لینڈ کی پلیئنگ 11 میں ٹام لیتھم، ڈیون کونوے، کین ولیمسن، ہینری نکلز، ڈیرل مچل، ٹام بلنڈل، مائیکل بریسویل، کپتان ٹم ساؤتھی، اش سودھی نیل ویگنر اور اعجاز پٹیل شامل ہیں۔

پاکستان اور نیوزی لیںڈ کے درمیان اب تک 60 ٹیسٹ میچ کھیلے گئے ہیں جس میں 25 میچز میں پاکستان جبکہ 14 میچز میں نیوزی لینڈ نے فتح حاصل کی اور 21 میچ ڈرا ہوئے۔