اجے دیوگن کا روہت شیٹھی کے ساتھ فلم ’سنگھم‘ تھری بنانے کا اعلان

بالی وُڈ کے سپرسٹار اجے دیوگن نے اپنی مشہور فلم فرنچائز ’سنگھم‘ کی تیسری فلم بنانے کا اعلان کیا ہے۔
اجے دیوگن سنگھم فرنچائز کے ڈائریکٹر روہت شیٹھی کے ساتھ مل کر ’سنگھم اگین‘ بنائیں گے۔
’سنگھم اگین‘ بنانے کا اعلان اجے دیوگن نے پیر کے روز سماجی رابطوں کی ویب سائٹ ٹوئٹر پر کیا۔

اجے دیوگن اپنی ٹویٹ میں لکھتے ہیں کہ ’روہت شیٹھی سے ’سنگھم اگین‘ کی کہانی سن کر نئے سال کا آغاز اچھا ہوگیا ہے، جو سکرپٹ میں نے سنا ہے وہ آگ ہے، خدا نے چاہا تو یہ ہماری 11 ویں بلاک بسٹر فلم ہوگی۔‘
سنہ 2011 میں سنگھم فرنچائز کی پہلی سپرہٹ فلم ’سنگھم‘ ریلیز ہوئی تھی جس نے باکس آفس پر کامیابی کے جھنڈے گاڑے تھے۔
اس فلم میں اجے دیوگن کے ساتھ جنوبی انڈیا کی اداکارہ کاجل اگروال نے مرکزی کردار ادا کیا تھا، تاہم فلم میں پراکاش راج کی بطور وِلن (جے کانت شکرے) اداکاری کو بہت سراہا گیا تھا۔
اس کے بعد 2014 میں سنگھم کی سیکوئل فلم ’سنگھم ریٹرنز‘ ریلیز ہوئی تھی جو کہ سپرہٹ فلم تھی۔
اس فلم میں کاجل اگروال کی جگہ کرینہ کپور خان نے اجے دیوگن کے ساتھ مرکزی کردار ادا کیا تھا۔

روہت شیٹھی نے اپنی پولیس سیریز ’کاپ یونیورس‘ کی بنیاد سنگھم فلم سے ہی رکھی تھی۔
ان دونوں فلموں کی کامیابی کے بعد روہت شیٹھی نے 2018 میں رنویر سنگھ کے ساتھ ’سمبا‘ فلم بنائی تھی جو کہ بلاک بسٹر رہی۔
اس فلم کے بعد روہت شیٹھی نے 2021 میں اکشے کمار کے ساتھ ’سوریا ونشی‘ بنائی، یہ فلم بھی ہٹ ثابت ہوئی تھی۔
روہت شیٹھی کی ان تمام فلموں میں ایک بات مشترک ہے کہ ان میں ہیرو پولیس افسر کا کردار ادا کرتے ہیں۔