انڈین خواتین ریسلرز کا مرد کوچز پر جنسی ہراسیت کا الزام

کامن ویلتھ گیمز اور ایشیئن گیمز میں گولڈ میڈل جیتنے والی پہلی انڈین خاتون ریسلر وینیش پھوگٹ نے ریسلنگ فیڈریشن آف انڈیا (ڈبلیو ایف آئی) پر سنگین الزامات لگائے ہیں۔
این ڈی ٹی وی کے مطابق وینیش پھوگٹ نے ڈبلیو ایف آئی اور اس کے صدر برج بھوشن شرن سنگھ پر الزامات لگاتے ہوئے کہا کہ ’نیشنل کوچز خواتین ریسلرز کا برسوں سے جنسی استحصال کرتے آرہے ہیں جبکہ خواتین ریسلرز کو ڈبلیو ایف آئی کے حکام نے جان سے مارنے کی دھمکیاں بھی دی ہیں۔‘

گولڈ میڈیلسٹ وینیش پھوگٹ سمیت انڈیا کی صف اول کی ریسلرز نے بدھ کے روز دارالحکومت نئی دہلی کے جنترمنتر پر بڑا مظاہرہ کیا اور برج بھوشن شرن سنگھ کو عہدے سے ہٹانے کا مطالبہ کیا۔
وینیش پھوگٹ کہتی ہیں کہ ’ہمیں دھمکایا گیا کہ اگر ہم کچھ بولے تو ہمارے کیریئر ختم کر دیے جائیں گے، فیڈریشن کے ارکان نے خواتین ریسلرز کی بے حرمتی کی، ہم نے وزیراعظم تک رسائی حاصل کی ہے۔‘
انہوں نے کہا کہ ’بعض کوچز فیڈریشن کے قریب ہیں، انہوں نے نوجوان لڑکیوں کا استحصال کیا ہے، نہیں جانتے کہ کتنی نوجوان لڑکیاں اس سے متاثر ہوئی ہیں۔‘
’تقریباً 10 سے 12 خواتین نے تو مجھے بتایا ہے کہ ڈبلیو ایف آئی کی جانب سے انہیں جنسی طور پر ہراساں کیا گیا ہے، میں ان کے نام نہیں بتا سکتی لیکن ہم جب وزیراعظم اور وزیر داخلہ سے ملیں گے تو نام ضرور ظاہر کروں گی۔‘
28 سالہ ریسلر نے یہ بھی بتایا کہ ’انہیں جنسی ہراسیت کا سامنا نہیں کرنا پڑا، تاہم انہیں فیڈریشن کے صدر کے قریبی حکام سے دھمکیاں ضرور ملی ہیں۔‘
اولمپکس میں کانسی کا تمغہ جیتنے والی بجرنگ پُونیا کہتی ہیں کہ ’ہم کسی بھی انٹرنیشنل ایونٹ میں تب تک حصہ نہیں لیں گے جب تک صدر کو ہٹایا نہیں جاتا، ہماری لڑائی حکومت یا انڈین سپورٹس اتھارٹی سے نہیں بلکہ ڈبلیو ایف آئی کے خلاف ہے، یہ اب آر یا پار کی لڑائی ہے۔‘

فروری 2019 میں تیسری مرتبہ ڈبلیو ایف آئی کے صدر بننے والے برج بھوشن شرن سنگھ نے اپنے بیان میں کہا ہے کہ ’ریسلرز کے مظاہرے کا سنتے ہی میں یہاں آیا ہوں۔‘
’اگر کسی کو فیڈریشن سے ایسے مسائل کا سامنا کرنا پڑ رہا تھا تو 10 برسوں میں پہلے کیوں نہیں بتایا، جب بھی قوانین بنائے جاتے ہیں، ایسے مسائل سامنے آجاتے ہیں۔‘

برج بھوشن شرن سنگھ نے مزید کہا کہ ’ریسلرز کے میرے خلاف الزامات بے بنیاد ہیں، اگر جنسی ہراسیت کا ایک بھی کیس ثابت ہوجائے تو میں پھانسی پر چڑھنے کو تیار ہوں، میں صدارت نہیں چھوڑ رہا، لیکن میں پولیس اور سی بی آئی کی تفتیش کا سامنا کرنے کے لیے تیار ہوں۔‘

انہوں نے یہ دعویٰ بھی کیا کہ ’ایک صنعت کار ان کے خلاف سازش کر رہا ہے، اگر وینیش کو جان سے مارنے کی دھمکیاں ملی ہیں تو انہوں نے پولیس میں مقدمہ کیوں نہیں درج کروایا؟‘