کنگ سلمان ریلیف سینٹر کا سیلاب متاثرین کی امداد کے لیے دوسرے مرحلے کا آغاز

کنگ سلمان ریلیف سینٹر نے پاکستان میں سیلاب سے متاثرہ علاقوں میں نان فوڈ آئٹمز پر مبنی ونٹر ریلیف فراہمی کے منصوبے کے دوسرے مرحلے کا آغاز کر دیا ہے۔ جس کے تحت سیلاب سے متاثرہ افراد میں 25 ہزار نان فوڈ آئٹمز کِٹس اور 25 ہزار ونٹر کِٹس تقسیم کی جائیں گی۔

جمعرات کو اس سلسلے میں سعودی سفارت خانے میں ایک تقریب کا اہتمام کیا گیا جہاں کِٹس نیشنل ڈیزاسٹرمینجمنٹ اتھارٹی کے حوالے کی گئیں۔ تقریب میں سعودی سفیر نواف سیعد المالکی، کنگ سلمان ریلیف کے کنٹری ڈائریکٹر ڈاکٹر خالد محد العثمانی اور چیئرمین نیشنل ڈیزاسٹرمینجمنٹ اتھارٹی لیفٹینینٹ جنرل انعام حیدر ملک نے شرکت کی۔

اس موقع پر اپنے خطاب میں سعودی سفیر نواف سعید المالکی نے کہا کہ ’یہ نان فوڈ آئٹمز کِٹس سعودی حکومت کیجانب سے برادر ملک پاکستان کے سیلاب متاثرین کے ایک تحفہ ہیں جو سندھ اور پنجاب کے متاثرین میں تقسیم کی جائیں گی۔ کنگ سلمان ریلیف سینٹر پاکستان کے سیلاب متاثرین کی مدد اور بحالی میں ہراول دستے کا کردار ادا کر رہی ہے۔

انہوں نے کہا کہ ’سعودی حکومت پاکستانی عوام کے ساتھ ہر مشکل گھڑی میں کھڑی ہوگی۔ اس کے ساتھ ساتھ شاہ سلمان کی قیادت میں سعودی حکومت کی جانب سے پاکستان کے عوام کو یقین دلاتے ہیں کہ ہم اپنے تعلقات کو نئی بلندیوں تک لے کر جائیں گے۔‘

اس موقع پر کنگ سلمان ریلیف کے کنٹری ڈائریکٹر ڈاکٹر خالد محد العثمانی نے کہا کہ یہ منصوبہ بنیادی طور پر دو پروگراموں کا مجموعہ جس میں نان فوڈ آئٹمز کِٹس اور ونٹر کِٹس کی تقسیم ہے۔ ان کِٹس میں دو کمبل، شیلٹر کِٹ، چٹائی، کچن سیٹ، صاف پانی کے لیے کین اور اینٹی بائیوٹک صابن شامل ہیں۔

ونٹر پیکیج کے تحت 50 ہزار رضائیاں اور 25 ہزار کِٹس تقسیم کی جائیں گی جن میں مردانہ زنانہ گرم شالیں اور بچوں و بڑوں کے لیے گرم ملبوسات شامل ہیں۔ پراجیکٹ کے تیسرے اور چوتھے مرحلے میں پنجاب اور سندھ کے تمام متاثرہ علاقوں میں تقسیم کا عمل بھی جلد مکمل کر لیا جائے گا۔

ان کا کہنا تھا کہا کہ کنگ سلمان کا یہ ریلیف پیکیج  این ڈی ایم اے، صوبائی حکومتوں کی مدد سے شفاف طریقے سے تقیسم کیا جا رہا ہے جس سے مجموعی طور پر 3 لاکھ  50 ہزار سے زائد افراد مستفید ہوں گے۔

کنگ سلمان ریلیف سینٹر کے کنٹری دائریکٹر نے کہا کہ ’این ڈی ایم اے کے ساتھ رابطے کے ذریعے ہم سیلاب سے متاثرہ علاقوں میں بحالی کا عمل شروع کرنے کا بھی جائزہ لے رہے ہیں۔ جلد ہی متاثرہ علاقوں میں مکانوں اور سکولوں کی تعمیر کا کام بھی شروع کر دیا جائے گا۔‘

تقریب سے خطاب کرتے ہوئے این ڈی ایم اے کے چیئرمین لیفٹینینٹ جنرل انعام حیدر ملک سعودی حکومت کا شکریہ ادا کرتے ہوئے کہا کہ پاکستانی عوام اور حکومت سعودی حکومت کی جانب سے مسلسل امداد کو قدر کی نگاہ سے دیکھتے ہیں۔ سعودی حکومت پاکستان کے سیلاب سے متاثرہ علاقوں کی بحالی اور تعمیر نو میں تعاون کا سب سے بڑا ذریعہ ہے۔

انہوں نے کہا کہ این ڈی ایم اے وفاقی، صوبائی اور مقامی حکومتوں کے ذریعے اور اپنے انٹرنیشنل پارٹنرز کے تعاون سے سیلاب متاثرین اور متاثرہ علاقوں کی بحالی کے لیے کوئی کسر نہیں اٹھا رکھیں گے۔

چیئرمین این ڈی ایم اے نے کہا کہ پاکستان میں سعودی سفارت خانہ اور کنگ سلمان ریلیف نے پاکستان میں ہمیشہ قدرتی آفات میں بڑھ چڑھ کر کردار ادا کیا ہے۔

خیال رہے کہ حالیہ سیلاب کے بعد نازک صورت حال کے پیش نظر سعودی ادارہ اس پروجیکٹ کے پہلے مرحلے میں 10 ہزار نان فوڈ  کِٹس اور 25 ہزار ونٹر ریلیف کٹس تقسیم کر چکا ہے۔