رمضان کے دوران مساجد میں عطیات جمع کرنے پر پابندی

سعودی وزیر اسلامی امور و دعوت و رہنمائی ڈاکٹرعبداللطیف آل شیخ نے رمضان میں عطیات جمع کرنے اور نماز کے مناظر نشر کرنے کے لیے کیمروں کے استعمال پر پابندی عائد کی ہے۔

عکاظ اخبار کے مطابق وزیر اسلامی امور نے رمضان کے استقبال کے لیے تمام مساجد میں ضروری انتظامات کا حکم جاری کیا ہے۔

وزیر اسلامی امورنے مملکت میں وزارت کی تمام شاخوں کے سربراہوں کو تحریری ہدایت جاری کی ہے۔

تحریری ہدایت میں کہا گیا کہ ’مساجد کے آئمہ اورموذن ڈیوٹی کی مکمل پابندی کریں۔ انتہائی ضرورت کے علاوہ کسی حالت میں رمضان کے دوران ڈیوٹی سے غیرحاضر نہ ہوں۔ غیر حاضری کی صورت میں امامت اور اذان کے لیے متبادل انتظام کریں۔ وزارت کی انتظامیہ سے اس کی منظوری بھی لیں۔‘

ایک ہدایت کی گئی ہے کہ ’اذان ام القری کیلنڈر میں مقررہ وقت پر دی جائے۔ عشا کی اذان رمضان میں مقررہ وقت پر دی جائے۔ اذان کے بعد تکبیر کے دورانیہ کی پابندی کی جائے۔‘

سعودی وزیر اسلامی امور نے یہ بھی ہدایت کی کہ ’مساجد میں کیمروں کی تنصیب کے ضوابط کی پابندی کی جائے، نماز کے دوران امام اور نمازیوں کی عکس بندی کے لیے کیمرے استعمال نہ کیے جائیں۔ ذرائع ابلاغ سے نماز کے مناظر نشر نہ کیے جائیں۔‘

ایک ہدایت یہ دی گئی ہے کہ ’اعتکاف کے لیے اجازت نامے امام مسجد جاری کریں گے اور وہی اس بات کے ذمہ دار ہوں گے کہ اعتکاف کرنے والے کوئی خلاف قانون کام نہ کریں۔‘

اعتکاف کرنے والوں کی نجی معلومات کا اندراج امام کی ذمہ داری ہو گی۔ اعتکاف کے خواہش مند غیرملکی سے کفیل کی منظوری کا خط بھی طلب کیا جائے گا۔

بیان میں مزید کہا گیا کہ ’افطار کرانے سمیت کسی بھی عنوان سے عطیات نہ جمع کیے جائیں۔ افطار دستر خوان کے سلسلے میں مقررہ ضوابط کی پابندی کریں۔ افطار دسترخوان کے لیے خیمے لگانے یا عارضی کمرے قائم کرنے کی اجازت نہیں ہوگی۔‘