مصری حکام نے غیرملکی سیاحوں کے لیے کئی ترغیبات کا اعلان کیا ہے جس کے تحت 5 سال کا سیاحتی ویزا 700 ڈالر میں جاری کیا جائے گا۔ 

سی این این اور سبق ویب سائٹس کے مطابق مصری وزیر سیاحت و آثار قدیمہ احمد عیسیٰ نے کہا ہے کہ 700 ڈالر میں 5 سالہ سیاحتی ویزا ملٹی پل ہوگا۔ چین، ترکیہ، انڈیا اور ایران کے سیاحوں کو جنوبی سینا کے ایئرپورٹس، بندرگاہوں اور سرحدی چیک پوسٹوں کے ذریعے ہنگامی ویزا بھی جاری کیا جائے گا۔ 

مصری حکومت نے سیاحتی ویزے کی نئی پالیسی 2028 تک سیاحوں کی سالانہ تعداد 30 ملین تک پہنچانے کے ٹارگٹ کو پورا کرنے کے لیے جاری کی ہے۔

مصری حکومت نے پروازوں کی نشستوں کی تعداد بھی بڑھائی ہے جبکہ ہوٹل کے کمروں کی تعداد میں بھی اضافہ کیا جا رہا ہے۔

وزیر سیاحت نے نئے سیاحتی ویزے کے اجرا کی تاریخ ابھی نہیں بتائی تاہم ان کا کہنا ہے کہ بہت جلد اس فیصلے  پرعمل درآمد شروع ہو جائے گا۔

مصری ایوان ہائے صنعت و تجارت کونسل میں سیاحتی ایجنسیوں اور کمپنیوں کے رکن ڈاکٹر مجدی صادق نے بتایا کہ ’نئے سیاحتی ویزے کی فیس 700 ڈالر بہت سوچ سمجھ کر رکھی گئی ہے۔ یہ خطے کے دیگر سیاحتی ممالک کے مقابلے میں ہی نہیں بلکہ امریکہ کے حوالے سے بھی بے حد کم ہے۔‘

انہوں نے کہا کہ ’متحدہ عرب امارات اور سعودی عرب نے سیاحتی ویزوں کی جو فیس رکھی ہے وہ مصر سے زیادہ  ہے۔‘

ڈاکٹر مجدی صادق کا کہنا ہے کہ ’سیاحوں کو راغب کرنے کے لیے مفت سیاحتی ویزا سکیم بھی متعارف کرائی جا رہی ہے۔ 2022 کے دوران 11.7 ملین سیاح مصر آئے تھے جو2021 کے مقابلے میں 46 فیصد زیادہ تھے۔‘

خود کو اپ ڈیٹ رکھیں، واٹس ایپ گروپ جوائن کریں