کراچی والوں کے لہجے کی نقل: سوشل میڈیا پر ایمان علی کی تعریف مگر تنقید بھی

پاکستانی اداکارہ ایمان علی سماجی رابطوں کی ویب سائٹ ٹوئٹر پر دلچسپ وجہ کے باعث ٹرینڈ کر رہی ہیں۔

ایمان علی نے گزشتہ ہفتے عید کے موقع پر نجی ٹی وی چینل اے آر وائی ڈیجیٹل پر ہوسٹ  ندا یاسر کے شو ’گُڈ مارننگ پاکستان‘ میں شرکت کی جہاں ان کے ساتھ سپر سٹار ہمایوں سعید، عائشہ عمر سمیت سونیا حسین بھی شریک تھیں۔

اسی دوران جب شو میں عید کے روز پکوان بنانے کے بات ہوئی تو سونیا حسین نے کہا کہ ’ہمارے گھر میں بریانی تو ضرور بنتی ہے کیونکہ سب کو بہت پسند ہے۔‘

اس پر ندا یاسر کہتی ہیں کہ ’یہ آگئی نا کراچی والی۔‘

اس کے جواب میں ایمان علی نے کراچی والوں کے لہجے کی نقل اتارتے ہوئے بولتی ہیں کہ ’ہاں کراچی والی آ گئی۔‘

اُن کی اس مزاحیہ حرکت شو میں شامل تمام لوگ کِھل کر ہنس پڑے۔

اس کلپ کے وائرل ہونے کے بعد ایمان علی کے بارے میں ٹوئٹر پر تبصروں کا آغاز ہو گیا ہے۔

ٹوئٹر ہینڈل ’اقرار ہوا تھا‘ نے ٹویٹ میں لکھا کہ ’ہر لڑکی ایمان کی طرح کیوں نہیں ہو سکتی؟‘

سدریش خان نے اُن کی خوب صورتی کی تعریف کرتے ہوئے کہا کہ ’حسنِ جاناں کی تعریف ممکن نہیں۔‘

جِبی ڈی اپنے ٹویٹ میں ایمان علی کی ویڈیو اپلوڈ کرتے ہوئے کہتے ہیں کہ ’ایمان علی پاکستان کی خوب صورت خاتون ہیں۔ ہمارا عروج یہ تھا۔ باقی سب اُن سے کئی میل پیچھے ہیں۔‘

ٹوئٹر ہینڈل روٹی کھول دیو نے اس پر جواب دیا کہ ’کیا کوئی اور بھی یہ سمجھتا ہے کہ ایمان علی کے پاس کرینہ کپور جیسی انرجی ہے؟‘

42  سالہ اداکارہ کی جانب سے لہجے کی نقل کرنے پر کچھ صارفین ناراضی کا اظہار بھی کر رہے ہیں۔

ذیشان اپنی ٹویٹ میں کہتے ہیں کہ ’میں کراچی سے نہیں ہوں لیکن میں اسے ذرا بُرا سمجھ رہا ہوں۔‘

محمد نے لکھا کہ ’ایمان زندہ دل خاتون ہیں لیکن بہتر ہوتا اگر وہ یہ مذاق نہ کرتیں۔‘

راشد نے تنقید کرتے ہوئے تبصرہ کیا کہ ’پاکستان کی پوری 23 کروڑ آبادی ایمان علی کی روایتی نسل پرستی کا دفاع کر رہی ہے۔‘

سید شہباز حیدر نے بھی اپنے خیالات کا اظہار کرتے ہوئے لکھا کہ ’تھوڑی سی غیر مقبول رائے ہے لیکن میں نے ہمیشہ ایمان علی کو انٹرویوز میں تھوڑا بد تمیز اور تنگ کرتے دیکھا ہے۔ انہیں اس وجہ سے کینسل نہیں کیا جاتا کہ وہ انٹرویوز کے لیے خوب بن سنور کر آتی ہیں۔‘