فرحان خان، اردو نیوز- اسلام آباد 
امپورٹڈ موبائل فونز پر گزشتہ برس لگائی گئی ریگولیٹری ڈیوٹی کی معیاد ختم ہونے پر چند موبائل فون کمپنیوں نے اپنے صارفین کو ڈیوائسز کی قیمتیں کم کرنے کی اطلاع دی ہے۔
موبائل فون بنانے والی کمپنی ٹیکنو کی جانب سے منگل کو اپنے ڈیلرز اور ڈسٹری بیوٹرز کو بھیجے گئےنوٖٹیفیکیشن کے مطابق کمپنی نے اپنے چار ماڈلز جبکہ انفینکس نے دو ماڈلز کی قیمتوں میں کمی کی ہے۔
مزید پڑھیں
-
-
’سونا اور ہیرے‘، دنیا کے مہنگے ترین موبائل فونز کی قیمت کیا ہے؟Node ID: 749086 -
نوٹیفیکیشن کے مطابق ٹیکنو کا کینن 19 نیو 13 ہزار، سپارکس 8 سی سات ہزار، پووا نیو نو ہزار جبکہ پوپ 5 لائٹ آٹھ ہزار روپے سستا کر دیا گیا ہے۔
دوسری جانب انفینکس نے بھی نوٹ 12 اور ہاٹ 12 کی قیمتوں میں نو نو ہزار روپے کی کمی کی ہے، یوں یہ دونوں فونز بالترتیب 63 ہزار 999 اور 53 ہزار 999 سے کم ہو کر 54 ہزار 999 اور 44 ہزار 999 روپے کے ہو گئے ہیں۔
’پچھلے ماہ فون لیا، اب پتا چلا کہ 11 ہزار روپے سستا ہو گیا‘
کچھ کمپنیوں موبائل فونز کی قیمتوں میں کمی سے جہاں صارفین خوش ہیں وہیں مقامی موبائل مینوفیکچرنگ کے شعبے سے وابستہ افراد کے کچھ تحفظات بھی ہیں۔
ایک صارف محمد عامر نے اردو نیوز کو بتایا کہ ’میں نے رمضان کے مہینے میں انفینکس کا موبائل فون 45 ہزار روپے میں خریدا تھا۔ پرسوں مجھے جب پتا چلا کہ یہی موبائل فون کم ہو کر اب 34 ہزار کا ہو گیا ہے تو جھٹکا سا لگا۔‘
انہوں نے کہا کہ ’میرا ایک طرح سے 11 ہزار کا نقصان ہو گیا ہے۔‘
’مقامی مینوفیکچرنگ انڈسٹری خطرے میں ہے‘
پاکستان موبائل فون مینوفیکچررز ایسوسی ایشن کے نائب صدر عامر اللہ والا سمجھتے ہیں کہ امپورٹڈ فونز پر ڈیوٹی کم ہونے سے مقامی مینوفیکچرنک مارکیٹ متاثر ہو گی۔
انہوں نے اردو نیوز سے گفتگو کرتے ہوئے کہا کہ ’ہماری موبائل فون بنانے والی انڈسٹری ایل سیز نہ کھلنے کہ وجہ سے دو ماہ سے بند پڑی ہے۔ ان حالات میں لگ بھگ 40 ہزار افراد کی نوکریاں خطرے میں پڑ چکی ہیں۔‘
’ریگولیٹری ڈیوٹی کم ہونے کی وجہ سے امپورٹڈ موبائل فونز ملک میں آنا شروع ہو گئے ہیں جس سے مقامی مارکیٹ پر اثر پڑ رہا ہے۔
ان کے بقول ’امپورٹڈ فونز پر ڈیوٹی 20 فیصد تھی جو اب نصف ہو گئی ہے۔‘
عامر اللہ والا کا کہنا تھا کہ ’ڈیوٹی کم ہونے سے امپورٹرز کو تو فائدہ ہو گا لیکن مقامی سطح پر موبائل فونز بنانے والوں اور حکومت کو نقصان ہو گا۔‘
’ظاہر ہے حکومت کو پہلے کی نسبت کم ٹیکس ملے گا۔‘
اس سوال پر کہ کیا جن موبائل فون کمپنیوں نے قیمتیں کم کی ہیں، وہ پاکستان میں بھی موبائل فونز تیار کرتی ہیں؟ عامر اللہ والا نے بتایا کہ ’پاکستان میں تقریباً تمام بڑی موبائل فون کمپنیوں کے پلانٹس لگ چکے ہیں لیکن جن فونز کی قیمتیں کم ہوئیں وہ یہاں تیار نہیں ہوئے بلکہ امپورٹ کیے گئے ہیں۔ ان پر آپ کو پاکستان کا نام نہیں ملے گا۔‘
’اگر موبائل فونز کے پرزوں کی امپورٹ کے لیے ایل سیز نہ کھلیں تو مقامی مارکیٹ شدید متاثر ہو گی۔‘
ایل سی کیا ہوتی ہے؟
ایل سی یا لیٹر آف کریڈٹ بینک یا مالی ادارے کی طرف بھیجا جانے والی ایسی دستاویز ہے جو اس بات کی گارنٹی دیتی ہے کہ فروخت کنندہ خریدار سے مکمل رقم بروقت وصول کرے گا۔ اس کا استعمال عالمی کاروباری صنعت میں ہوتا ہے اور اس کے لیے کسی بھی ملک کے مرکزی بینک کی مںظوری کی ضرورت ہوتی ہے۔
’دیگر کمپنیاں بھی قیمتیں کم کریں گی‘
الیکٹرانک ڈیلرز ایسوسی ایشن کے سینیئر نائب صدر منہاج گلفام ریگولیٹری ڈیوٹی کم ہونے کو خوش آئند سمجھتے ہیں۔
منہاج گلفام نے اردو نیوز سے گفتگو میں کہا کہ ’ریگولٹیری ڈیوٹی کم ہونے کے حوالے سے ابھی تک کوئی باقاعدہ ایس آر او تو جاری نہیں ہوا لیکن تین کمپنیوں ٹیکنو، انفینکس اور شیومی نے اپنے اپنے موبائل فونز کے نرخوں میں کمی کی ہے۔‘
انہوں نے یہ بات تسلیم کی کہ مقامی مینوفیکچررز کو ابھی مشکلات کا سامنا ہے کیونکہ ’انہیں خام مال امپورٹ کرنا پڑتا ہے اور ابھی تک ان کے ایل سیز سے متعلق مسائل چل رہے ہیں۔‘
