’معافی مانگیں ورنہ قانونی کارروائی‘، بشریٰ بی بی کا مریم نواز کو قانونی نوٹس

چیئرمین پاکستان تحریک انصاف عمران خان کی اہلیہ بشریٰ بی بی نے بدعنوانی کے الزامات عائد کرنے پر مسلم لیگ ن کی نائب صدر مریم نواز کو قانونی نوٹس بھیج دیا ہے۔

پاکستان تحریک انصاف کے میڈیا سیل کی جانب سے جمعرات کو شیئر کیے گئے قانونی نوٹس کے مطابق بشریٰ بی بی نے بے بنیاد الزامات پر مریم نواز کے خلاف باضابطہ قانونی کارروائی کا آغاز کرتے ہوئے انہیں قانونی نوٹس بھجوا دیا ہے۔

بشریٰ بی بی نے قانونی نوٹس فیصل فرید ایڈووکیٹ کی وساطت سے بھجوایا ہے جس میں مریم نواز سے 7 روز میں غیر مشروط معافی مانگنے کا مطالبہ کیا گیا ہے۔

بیان واپس نہ لینے پر مریم نواز کو ضابطۂ فوجداری اور ہتکِ عزت سمیت متعلقہ قوانین کے تحت قانونی کارروائی کی دھمکی دی گئی ہے۔

پی ٹی آئی کی جانب سے جاری بیان میں کہا گیا ہے کہ ’ضابطۂ فوجداری کے تحت کسی شہری کو بدنام کرنے کا جُرم ثابت ہونے پر پانچ سال قید کی سزا ہوسکتی ہے۔‘

 قانونی نوٹس کے مطابق مریم نواز نے یکم مئی کو لاہور میں تقریر کے دوران بشریٰ بی بی کے خلاف جھوٹی اور بےبنیاد الزام تراشی کی۔  

مریم نواز کے الزامات پر مبنی تقریر کا متن بھی نوٹس کا حصہ بنایا گیا ہے۔

نوٹس میں مزید کہا گیا ہے کہ مریم نواز جان بوجھ کر بشریٰ بی بی اور ان کے اہلِ خانہ کو بدنام کرنے کے لیے بدنیتی پر مبنی مہم چلا رہی ہیں۔