ایران میں جدید ترین بیلسٹک میزائل ’خیبر‘ کا کامیاب تجربہ

مشرق وسطیٰ میں سب سے بڑے میزائل پروگرام کے حامل ایران نے جمعرات کو 2000 کلومیٹر رینج کے خرمشہر بیلسٹک میزائل 'خیبر' کا کامیاب تجربہ کیا ہے۔

روئٹرز نیوز ایجنسی کے مطابق ایران کے سرکاری خبررساں ادارے ارنا نے رپورٹ کی ہے کہ اسرائیل کی مسلح افواج کے سربراہ کی جانب سے تہران کے جوہری پروگرام پر 'کارروائی' کے امکان کے دو دن بعد یہ کامیاب تجربہ کیا گیا ہے۔

سرکاری رپورٹ میں بتایا گیا ہے کہ ایران کے پاس موجود میزائل خطے میں اسرائیل اور امریکی اڈوں تک پہنچنے کی صلاحیت رکھتے ہیں۔

دوسری جانب تہران نے کہا ہے کہ وہ امریکہ اور یورپی ممالک کی مخالفت کے باوجود اپنے 'دفاعی' میزائل پروگرام کو مزید ترقی دے گا۔

اس موقع پر ایرانی وزیر دفاع محمد رضا اشتیانی نے کہا ہے کہ دشمنوں کے لیے  پیغام ہے کہ ہم اپنے ملک اور یہاں حاصل کی جانے والی کامیابیوں کا دفاع کریں گے۔

وزیر دفاع نے مزید کہا کہ دوستوں کے لیے ہمارا پیغام ہے کہ ہم علاقائی استحکام میں تعاون کرنا چاہتے ہیں۔

ایران کے سرکاری ٹی وی پر نشر کی جانے والی رپورٹ میں بتایا گیا ہے کہ خرمشہر 4 بیلسٹک میزائل کا اپ گریڈ ورژن ہے جس کی رینج 2000 کلومیٹر ہے اور یہ میزائل 1500 کلوگرام وار ہیڈ لے جانے کی طاقت رکھتا ہے۔

سرکاری خبر رساں ایجنسی ارنا کی رپورٹ کے مطابق بیلسٹک میزائل کو خیبر کا نام دیا گیا ہے اور اس نام کا قلعہ مسلمانوں اور یہودیوں کے مابین معرکے میں مسلمانوں کے لیے تاریخی حیثیت رکھتا ہے۔

ایران ، جو اسرائیل کے وجود کو تسلیم نہیں کرتا اور اپنے لیے خطرہ سمجھتا ہے، کا کہنا ہےکہ اس کے بیلسٹک میزائل امریکہ، اسرائیل اور دیگر ممکنہ علاقائی مخالفین کے خلاف ایک اہم رکاوٹ اور  ردعمل کی حیثیت رکھتے ہیں۔