زبانیں سیکھنے کے خواہشمند افراد کے لیے 10 بہترین ایپلی کیشنز

جدید دور کی ترقی نے جہاں بہت سے کاموں کو آسان بنا دیا ہے وہاں مختلف زبانوں کے علم کو بھی سہل کر دیا ہے۔ سمارٹ ٹیکنالوجی کی بدولت اب بغیر کسی استاد کے مختلف زبانوں کے بارے میں اہم معلومات حاصل کی جا سکتی ہیں۔

 گوگل ٹرانسلیشن کی سہولت سے مختلف ممالک جانے والے سیاحوں کو یہ سہولت ہو گئی ہے کہ وہ جس ملک میں بھی جائیں وہاں کی زبان نہ آنے کے باوجود محض اپنے سمارٹ فون کے ذریعے وہاں کے مقامی افراد سے بآسانی بات چیت کر سکتے ہیں۔

ویب سائٹ سی نیٹ ڈاٹ کام کے مطابق متعدد ایسی ایپلی کیشنز ہیں جن کے ذریعے اب کسی استاد کی خدمات حاصل کیے بغیر یا انسٹی ٹیوٹ میں داخلہ لیے بغیر کسی بھی وقت میں انگلش کے علاوہ کوئی بھی زبان سیکھی جا سکتی ہے۔

زبانیں سیکھنے کی ایپلی کیشنز

 ڈیواؤ لنگو (Duolingo) 

مذکورہ ایپلی کیشن کے ذریعے انتہائی آسان انداز میں متعدد زبانوں کی سہولت فراہم کی جاتی ہے۔ یہ ایپلی کیشن آسان طریقے سے جملوں کو سمجھنے میں مدد فراہم کرتی ہے۔

زبان سیکھنے کے عمل کو آسان بناتے ہوئے اس میں سننے کی سہولت بھی ہے تاکہ جملوں کی ادائیگی کے درست طریقے سے آگاہی ہو۔

مذکورہ ایپلی کیشن کی ماہانہ فیس سات ڈالر ہے جس میں ماہانہ بنیاد پر ٹیسٹ بھی شامل ہے۔

 بیبل (Babbel) 

مذکورہ بالا ایپلی کیشن غیرملکی زبان کے آن لائن ٹیوٹر یا انسٹی ٹیوٹ جیسی ہے۔ اس ایپلی کیشن میں انتہائی آسان طریقے سے تعلیم کی سہولت فراہم کی گئی ہے۔

ہر موضوع کے ترجمے کی بھی سہولت ہے۔ مختلف جملوں اور عبارتوں کو آسان فہم بنانے کے لیے تصاویر بھی دیے گئے ہیں۔ یومیہ 15 منٹ کی ایک کلاس ہوتی ہے۔

 ڈراپس (Drops) 

جہاں تک مذکورہ ایپلی کیشن ڈراپس کا تعلق ہے اس میں انگلش حروف کے ذریعے مذکورہ زبان کے جملوں کا استعمال کیا جاتا ہے۔ اسے مزید آسان بنانے کے لیے دیگر ایپلی کیشنز کی طرح تصاویر کی سہولت بھی فراہم کی گئی ہے۔

مذکورہ ایپلی کیشن کے ورژن ’ڈراپس پریمیئر‘ کی ماہانہ فیس 13 ڈالر جبکہ سالانہ 70 ڈالر ہے یا لائف ٹائم ایک بار خریدنے پر160 ڈالر ہے جس میں 50 فیصد ڈسکاؤنٹ بھی دیا جاتا ہے۔

 مانڈلی (Mondly) 

اس ایپلی کیشن کو مزید آسان اور دلچسپ بنانے کے لیے اس میں متعدد خصوصیات فراہم کی گئی ہیں۔ اس میں ٹیوٹر سیکھنے والی زبان کے جملوں اور حروف کو انتہائی آسان طریقے سے سمجھاتا ہے۔

ابتدائی ورژن میں مذکورہ ایپلی کیشن مفت ہے تاہم ’پریمیئم‘ کے لیے ایک زبان سیکھنے کے لیے ماہانہ 10 ڈالر جبکہ سالانہ 48 ڈالر کی فیس ہے۔

 میمرائز (Memrise)  

جہاں تک میمرائز ایپلی کیشن کا تعلق ہے تو اس میں مختصر وڈیوز کے ذریعے مختلف زبانوں کی تعلیم دی جاتی ہے جس سے زبان کا سمجھنا مزید آسان ہو جاتا ہے۔ 

مذکورہ ایپلی کیشن میں لفظی ترجمے کی سہولت بھی فراہم کی جاتی ہے علاوہ ازیں سیکھنے والی زبان میں استعمال ہونے والے عام جملے اور فقرے بھی آسانی سے سمجھائے جاتے ہیں۔

اس ایپ میں بعض کورس مفت فراہم کیے جاتے ہیں تاہم اس کی رکنیت ماہانہ 15 ڈالر ہے جبکہ سالانہ 90 اور لائف ٹائم کے لیے 200 ڈالر مقرر ہیں۔

 لیریکا (Lirica) 

لیریکا ایپ کی خصوصیت یہ ہے کہ اس میں مطلوبہ زبان کی گرائمر کو اس کے اصل رموز کے تحت سکھایا جاتا ہے۔ علاوہ ازیں اس ایپ میں روایتی موسیقی کا بھی سہارا لیا جاتا ہے جس کی دھنوں کو الفاظ سے میچ کیا گیا ہے۔

ابتدائی طور پر اس ایپلی کیشن میں صرف ہسپانوی، فرانسیسی، جرمن اور انگلش کی سہولت ہے۔ اس ایپ کا تجرباتی ورژن مفت ہے جو کہ ایک ہفتے کے لیے ہے۔ اس کی 9 ڈالر ماہانہ اور 20 ڈالر 6 ماہ اور 30 ڈالر سالانہ کے حساب سے فیس مقرر ہے۔

پمسلر (Pimsleur)

اس ایپ میں بات چیت کے ذریعے زبان سکھائی جاتی ہے۔ اس میں پوڈکاسٹ بھی ہے۔ ابتدائی طور پر جو زبان سیکھنی ہوتی ہے تو اس کا ابتدائی کورس 30 منٹ کا ہوتا ہے جسے ڈاؤن لوڈ بھی کیا جا سکتا ہے۔ اس میں سننے والے پروگرام ہوتے ہیں جسے سن کر زبان سیکھی جا سکتی ہے۔

روسیتا سٹون (Rosetta Stone)

زبان سیکھنے کے حوالے سے اس ایپلی کیشن کا شمار ابتدائی ایپس میں ہوتا ہے۔

مذکورہ ایپلی کیشن کی تین ماہ کی فیس 35.97 ڈالرہے جبکہ 95.88 ڈالر سالانہ ہے۔ لائف ٹائم کے لیے اس ایپ کو حاصل کرنے کی فیس 179 ڈالرہے جبکہ اس میں 25 زبانیں سیکھنے کی سہولت موجود ہے۔

رائپ (Rype) 

یہ ایپلی کیشن دیگر ایپس سے قدرے مختلف ہے۔ اس میں طالبعلم کے لیے استاد موجود ہوتا ہے۔   

اس ایپ کی فیس انتہائی کم ہے اور محض ایک کورس حاصل کرنے پر آپ مزید کورسز بھی حاصل کر سکتے ہیں۔

زبانیں جاننے کی اہمیت

آج کل مختلف زبانیں جاننا بہت اہمیت اختیار کر گیا ہے۔ جتنی زیادہ زبانوں میں آپ مہارت حاصل کریں گے اتنا ہی آپ کی صلاحیتوں میں اضافہ ہو گا۔

کئی زبانیں جاننے والوں کے لیے ملازمتوں کے مختلف مواقع موجود ہوتے ہیں اور سفر کے دوران بھی انہیں کافی سہولت ہوتی ہے۔