اس عید پر خیبر پختونخوا کے اچھے پکنک سپاٹ کون سے ہیں؟

عید کی چھٹیاں ہوں اور سیر سپاٹا نہ ہو ایسا کیسے ممکن ہے۔ ہر سال لوگ بالخصوص عید الاضحٰی پر گوشت اور مرغن غذائیں کھانے کے بعد سیر وتفریح کے لیے صوبہ خیبرپختونخوا کے سیاحتی مقامات کا رخ کرتے ہیں۔

خیبر پختونخوا میں سیاحوں کی سب سے پسندیدہ جگہ سوات کی خوبصورت وادیاں ہیں جن میں کالام، مدین، مالم جبہ اور مہوڈنڈ سرفہرست ہیں۔ اسی طرح گلیات اور ناران کے علاقے بھی لوگوں کی دلچسپی کے مراکز ہیں۔ ان علاقوں میں سڑکوں کی حالت بہتر ہونے کی وجہ سے سیاحوں کی آمد زیادہ متوقع ہے۔ 

دوسری جانب کمراٹ اور چترال کے علاقے طویل اور کچی سڑکوں کے باعث دوسری ترجیح ہیں۔ 

خیبرپختونخوا ٹوارزم اتھارٹی کے ترجمان سعد بن اویس نے اردو نیوز کو بتایا کہ اس بار گرمی میں شدت کے باعث سیاحوں کی آمد زیادہ متوقع ہے اسی لیے پہلی بار تمام سیاحتی مقامات میں ٹوارزم پولیس کو تعینات کردیا گیا ہے جن کو جدید سامان اور سواری بھی مہیا کی گئی ہے ۔

انہوں نے بتایا کہ سوات میں مالم جبہ، گبین جبہ اور کالام کے راستے صاف ہیں اور قیام کے لیے بھی مناسب انتظامات بھی موجود ہیں ۔ مدین بحرین کے بازار میں پانی داخل ہوا تھا جو کہ اب مکمل طور بحال ہوچکا ہے ۔

ترجمان ٹوارزم اتھارٹی کے مطابق عید کے لیے ملاکنڈ اور ہزارہ ڈویژن کے 8 جگہوں پر پی ٹی ڈی سی ہوٹلز تزین و آرائش کے بعد کھول دیے گئے ہیں، اسی طرح کمیپنگ پاڈز بھی سیاح استعمال کر سکتےہیں۔

سعد بن اویس نے بتایا کہ مالم جبہ، کالام کے علاوہ کمراٹ اور چترال میں ایڈونچر ٹوارزم کے لیے زپ لائن اور ریور رافٹنگ کی تفریح بھی مہیا کی گئی ہے۔

ان کا مزید کہنا تھا کہ سیاحوں کے لیے ہیلپ لائن بھی فعال ہے جس سے سیاح مدد حاصل کرسکتے ہیں ۔

گلیات ڈویلپمنٹ اتھارٹی کے ترجمان احسن حمید نے اردو نیوز سے بات کرتے ہوئے کہا کہ گلیات کا موسم دیگر شہروں کی نسبت زیادہ خوشگوار ہے اس لئے یہاں کے سیاحتی مقامات سیاحوں کا رش زیادہ ہوتا ہے دوسری سب سے اہم بات گلیات کے تمام مقامات میں  سہولیات دستیاب ہیں۔ 

سیاحوں کی آسانی کے لئے دو کنٹرول رومز قائم کئے گیے ہیں جہاں سے شکایات دور کرنے کے لیے فوری طور پر ہدایات جاری کی جائیں گی۔ اسی طرح ٹریفک کی روانی کے لئے بھی دو مقامات پر ٹریفک کاونٹنگ سسٹم نصب کیا گیا ہے جس کی وجہ سے آنے والی گاڑیوں کی تعداد ہمیں معلوم ہو جاتی ہے۔

سوات، ناران کے ہوٹل ایڈوانس بک

ٹور گائیڈ محمد نبیل کے مطابق عید پر سوات اور ناران کے لئے سب سے زیادہ بکنگ کی گئ ہیں   ان علاقوں میں رش ہونے کا امکان زیادہ ہے اسی لیے ہوٹلز بھی پہلے ہی بک کر لیے گئے ہیں۔ 

اندازہ ہے کہ رواں سال عید الاضحٰی پر کراچی ، ملتان ، فیصل آباد اور لاہور سے سیاح بڑی تعداد میں گروپس کی صورت میں آئیں گے جبکہ بائیکرز کی بڑی تعداد کے ملاکنڈ کی طرف آنے کی توقع ہے۔

چترال اور کمراٹ: کیمپنگ کے دلدادہ لوگوں کی جنت

محمد نبیل کے مطابق چترال اور کمراٹ میں قدرتی خوبصورتی زیادہ ہے مگر رواں سال سیلاب اور لینڈ سلائینڈنگ کے خدشے کی وجہ سے زیادہ تر سیاح وہاں جانے سے کترا رہے ہیں۔ 

تاہم کیمپنگ اور ایڈونچر کے شوقین سیاح ابھی بھی ان علاقوں کا رخ کر رہے ہیں۔

فلیش فلڈنگ کا خدشہ

واضح رہے کہ پراونشل ڈیزاسٹر مینجمنٹ اتھارٹی خیبر پختونخوا نے پری مون سون بارشوں کی وجہ سے فلیش فلڈ اور لینڈ سلائیڈنگ کا خدشہ بھی ظاہر کیا ہے تاہم اس ضمن میں تمام متعلقہ اداروں اور ضلعی انتظامیہ کو حفاظتی تدابیر اختیار کرنے کی ہدایت بھی کی ہے۔