فیاض احمد -اردو نیوز، پشاور
خیبر پختونخوا کے محکمہ اطلاعات و نشریات کی جانب سے 30 سالوں سے اشاعت کرنے والے روزنامہ سرخاب اخبار کو بند کردیا گیا۔
اس حوالے سے 3 اگست کو اعلامیہ جاری ہوا جس میں اخبار انتظامیہ پر خبریں کاپی پیسٹ کرنے کا الزام لگا کر اسے سیکشن 19 کی خلاف ورزی قرار دیا گیا اور ڈائریکٹر جنرل انفارمیشن اینڈ پبلک ریلیشن نے ڈکلیریشن منسوخ کردیا۔
اخبار کے اجازت نامے کی منسوخی کے بعد اسے سیاسی انتقام کا رنگ دے کر شدید تنقید کا نشانہ بنایا جارہا ہے۔
مزید پڑھیں
اخبار کی بندش کو سیاسی رنگ کیوں دیا گیا؟
روزنامہ سرخاب کے مالک لیاقت یوسفزئی ہیں جو تحریک انصاف کے رہنما اور سابق صوبائی وزیر شوکت یوسفزئی کے چھوٹے بھائی ہیں۔ شوکت یوسفزئی نے سیاست میں آنے کے بعد 2013 میں ڈکلیریشن اپنے چھوٹے بھائی لیاقت یوسفزئی کے نام پر کردیا تھ ۔
سابق وزیر شوکت یوسفزئی کا موقف
سرخاب اخبار بند کرنے کے بعد سابق صوبائی وزیر شوکت یوسفزئی نے اپنے بیان میں موقف اپنایا کہ ’میرے بھائی کو سیاسی انتقام کا نشانہ بنایا جارہا ہے۔ اس اخبار کا یہ قصور ہے کہ اس کا چیف ایڈیٹر میرا بھائی ہے۔‘ ان کا کہنا تھا کہ نگراں حکومت نے پانچ ماہ پہلے سرکاری اشتہارات بند کیے اور ادائیگی روک دی۔
رہنما تحریک انصاف کے مطابق اشتہارات بند ہونے سے ملازمین کی تنخواہیں بھی نہیں دی جارہی ہیں۔ نگراں حکومت نے باقاعدہ منصوبہ بندی کرکے اخبار کو بند کیا۔
اخبار کے مالک کیا کہتے ہیں؟
روزنامہ سرخاب کے مالک لیاقت یوسفزئی نے اردو نیوز کو بتایا کہ ’حکومتی اقدام سیاسی انتقام ہے اور کچھ نہیں، میرے اخبار سے متعلق الزام لگایا گیا کہ اس میں کاپی پیسٹ خبریں چھپتی ہیں جوکہ جھوٹ پر مبنی ہیں۔ سرخاب کے اپنے رپورٹرز اور ڈیسک موجود ہے جن کا کام خبریں لانا اور شائع کرنا ہے۔‘
ان کا کہنا تھا کہ ’یہ اخبار شوکت یوسفزئی کا نہیں بلکہ میرا ہے۔ مجھے نوٹس کے ذریعے بتایا گیا کہ اپ کا ایڈیٹوریل پیچ کاپی پیسٹ ہے۔ میں خود صحافی رہا ہوں اور مجھے صحافتی اصولوں کے بارے میں علم ہے۔‘
انہوں نے کہا کہ ’صوبے میں بہت سے ڈمی اخبارات ہیں جو مکمل کاپی پیسٹ کرتے ہیں، لیکن ان کے خلاف ابھی تک کسی نے کارروائی نہیں کی۔ اس سے صاف ظاہر ہوتا ہے کہ مجھے شوکت یوسفزئی کی وجہ سے زور دیا جارہا ہے۔‘
