تحریک انصاف چاہے تو الیکشن کے لیے اتحاد پر بات ہوسکتی ہے: رہنما پی ٹی آئی (پی)

پاکستان تحریک انصاف (پارلیمینٹیرینز) کے سیکریٹری اطلاعات ضیا اللہ بنگش کا کہنا ہے کہ  پی ٹی آئی پارلیمنٹیرینز الیکشن کی بھرپور تیاری کر رہی ہے۔

اردو نیوز کے ساتھ گفتگو کرتے ہوئے ضیا اللہ بنگش کا مزید کہنا تھا کہ جہاں ضرورت پڑی ہم دوسری جماعتوں کے ساتھ اتحاد بھی کرسکتے ہیں۔ 

ان کا کہنا تھا کہ کورکمیٹی میں یہ فیصلہ کیا گیا کہ الیکشن میں ہر حلقے سے امیدوار میدان میں اتارے جائیں گے۔

ضیا اللہ بنگش نے کہا کہ پاکستان تحریک انصاف سمیت ہر سیاسی جماعت سے اتحاد کی بات ہوسکتی ہے ہمارے دروازے سب کے لیے کھلے ہوئے ہیں۔

خیال رہے پاکستان تحریک انصاف (پارلیمنٹیرینز) نے سیاسی سرگرمیوں شروع کرنے کا اعلان کردیا ہے۔ گذشتہ روز پشاور یونیورسٹی ٹاؤن میں سیکریٹیریٹ کے افتتاح کے بعد کور کمیٹی کا اجلاس منعقد ہوا جس میں پرویز خٹک سمیت تمام رہنماؤں نے شرکت کی۔

کورکمیٹی اجلاس میں پرویز خٹک چیئرمین جبکہ محمود خان وائس چیئرمین منتخب کیے گئے۔ اجلاس میں فیصلہ کیا گیا کہ اگست سے عوامی رابطہ شروع کیا جائے گا اور اس سلسلے میں پہلا جلسہ نوشہرہ میں 19 اگست کو منعقد کیا جائے گا، جبکہ مانسہرہ کوہاٹ، ڈی آئی خان، سوات، ہنگو، پشاور، مردان اور ایبٹ آباد میں بھی جلسے کیے جائیں گے۔ 

پاکستان تحریک انصاف (پارلیمنٹیرینز) کی تقریبات میں میڈیا کو کیوں دور رکھا گیا؟

پی ٹی آئی (پارلیمنٹیرینز) کا قیام ہو یا نئے دفتر کی افتتاح کی تقریب، میڈیا کو مدعو نہیں کیا گیا بلکہ میسج کرکے ان کو دفتر نہ آنے کی ہدایت کی گئی۔ ضیاء اللہ بنگش کے مطابق ’پارٹی ابھی نئی بنی ہے ، پارٹی منشور اور تنظیم سازی کے معاملات طے کرنے تھے، گذشتہ روز کور کمیٹی اجلاس تھا اس لیے میڈیا کو دعوت نہیں دی گئی۔‘

انہوں نے کہا کہ اب ذمہ داریاں تقسیم ہوچکی ہیں اس لیے جلد میڈیا کو دفتر بلایا جائے گا اور تفصیلی بریفنگ بھی دی جائے گی۔

کیا پی ٹی آئی کے مزید رہنما پارلیمنٹیرینز میں شامل ہو رہے ہیں؟

ضیاء اللہ بنگش نے دعویٰ کیا کہ اگست میں مزید رہنماؤں نے شامل ہونا ہے جس میں پی ٹی آئی کے علاوہ دیگر جماعتوں کے ورکرز شامل ہیں۔ ان کا کہنا تھا کہ پرویز خٹک اس سلسلے میں مختلف رہنماؤں سے رابطے میں ہیں۔ 

واضح رہے کہ 28 جولائی کو پاکستان تحریک انصاف نے 22 منحرف ارکین کی بنیادی رکنیت ختم کی ہے۔

یاد رہے کہ 17 جولائی کو پشاور کے شادی ہال میں پرویز خٹک نے نئی جماعت پی ٹی آئی (پارلیمنٹیرینز) کی بنیاد رکھی جس میں خیبر پختونخوا کے سابق وزیراعلٰی محمود خان سمیت تحریک انصاف کے کئی رہنما شامل ہوئے۔