ایشیا کپ: طیب طاہر کی جگہ سعود شکیل سکواڈ میں شامل

رواں ماہ سے پاکستان اور سری لنکا میں ہونے والے ایشیا کپ کے لیے پاکستان کرکٹ ٹیم کے سکواڈ میں نوجوان بیٹر طیب طاہر کی جگہ سعود شکیل کو شامل کر لیا گیا ہے۔

کرکٹ کی ویب سائٹ ’کرک اِنفو‘ کے مطابق طیب طاہر جنہیں پہلے 17 رُکنی سکواڈ کا حصہ بنایا گیا تھا وہ اب ایشیا کپ میں بطور ریزرو کھلاڑی جائیں گے۔

سعود شکیل اب تک صرف پانچ ون ڈے کھیل چکے ہیں تاہم اُن کی حالیہ ٹیسٹ میچوں میں عمدہ کارکردگی رہی ہے۔

اس سے قبل سعود شکیل کو صرف افغانستان کے خلاف ون ڈے سیریز کا حصہ بنایا گیا تھا تاہم سیریز کے تیسرے ون ڈے میں انہوں نے دو چوکوں کی مدد سے 9 رن بنائے۔

یاد رہے سعود شکیل نے 2021 میں انگلینڈ کے خلاف کارڈف میں اپنا ون ڈے ڈیبیو کیا تھا۔

دوسری جانب ایشیا کپ کے سکواڈ میں شامل کھلاڑی اتوار کے روز ملتان پہنچیں گے جہاں 30 اگست کو پاکستان اور نیپال کے درمیان ایونٹ کا پہلا میچ شیڈول ہے۔

پاکستان کا ایشیا کپ کے لیے سکواڈ

بابر اعظم (کپتان)، شاداب خان، محمد رضوان، سعود شکیل، فخر زمان، عبداللہ شفیق، امام الحق، سلمان علی آغا، افتخار احمد، محمد نواز، اُسامہ میر، حارث رؤف، نسیم شاہ، شاہین شاہ آفریدی، محمد حارث، فہیم اشرف، محمد وسیم، طیب طاہر (ریزرو)۔