اسرائیل حماس جنگ، اقوام متحدہ کی جنرل اسمبلی کا اجلاس جمعرات کو

اقوام متحدہ کی جنرل اسمبلی اسرائیل پر حماس کے عسکریت پسندوں کے حملے سے پیدا ہونے والے تنازع پر تبادلہ خیال کے لیے جمعرات کو اجلاس منعقد کرے گی۔

فرانسیسی نیوز ایجنسی اے ایف پی کے مطابق اقوام متحدہ کے صدر نے یہ اعلان رکن ممالک کے نام ایک خط میں کیا ہے۔

سلامتی کونسل اب تک جنگ سے متعلق کسی قرارداد پر اتفاق کرنے میں ناکام رہی ہے، لیکن کئی ریاستوں، جن میں عرب ممالک کے ایک گروپ کی جانب سے اردن، روس، شام، بنگلہ دیش، ویتنام اور کمبوڈیا شامل ہیں، نے جنرل اسمبلی کے صدر ڈینس فرانسس سے میٹنگ شیڈول کرنے کے لیے باضابطہ طور پر درخواست کی۔

اسرائیل، فلسطین کے معاملے پر منقسم اقوام متحدہ کی سلامتی کونسل نے گذشتہ ہفتے ایک روسی قرارداد کے مسودے کو مسترد کر دیا جس میں ’انسانی بنیادوں پر جنگ بندی‘ کا مطالبہ کیا گیا تھا۔

15 رکن ممالک میں سے صرف پانچ نے اس متن کی حمایت کی تھی، جس میں شہریوں کے خلاف تمام تشدد اور دہشت گردی کی تمام کارروائیوں کی مذمت کی گئی تھی، لیکن حماس کا نام نہیں لیا گیا تھا۔

اس کے بعد واشنگٹن نے برازیل کی طرف سے پیش کی گئی دوسری قرارداد کو ویٹو کر دیا کیونکہ متن میں اسرائیل کے اپنے دفاع کے حق کا ذکر نہیں تھا۔

کونسل کے 15 میں سے 12 ارکان نے اس قرارداد کے حق میں ووٹ دیا، جس میں ’حماس کے گھناؤنے دہشت گرد حملوں‘ کی بھی مذمت کی گئی، جبکہ روس اور برطانیہ نے اس میں حصہ نہیں لیا۔

سلامتی کونسل جمعرات کی صبح دس بجے جنرل اسمبلی کے اجلاس سے پہلے منگل کو اس مسئلے پر بات کرنے کے لیے ملاقات کرے گی۔