سڈنی ٹیسٹ سے امام اور شاہین آؤٹ، صائم ایوب کا ڈیبیو

پاکستان کرکٹ ٹیم مینجمنٹ نے آسٹریلیا کے خلاف بدھ سے شروع ہونے والےسڈنی ٹیسٹ میچ کے لیے اپنے 11 رکنی سکواڈ کا اعلان کر دیا ہے۔

پاکستان کرکٹ بورڈ (پی سی بی) کی جانب سے منگل کو ایکس (سابقہ ٹوئٹر) پر پلیئنگ الیون کی تفصیلات بتائی گئی ہیں۔ 

اوپنر امام الحق کو ان کی خراب کارکردگی کی وجہ سے ڈراپ کر دیا گیا ہے، اور ان کی جگہ بائیں ہاتھ سے کھیلنے والے جارحانہ بیٹر صائم ایوب اوپنر کے طور پر ڈیبیو کریں گے۔

تیسرے اور آخری ٹیسٹ کے لیے پلیئنگ الیون میں سپنر ساجد خان کو سکواڈ میں متعارف کرایا گیا ہے جبکہ فاسٹ بولر شاہین شاہ آفریدی کو آرام دیا گیا ہے۔

سڈنی ٹیسٹ میچ کے لیے پلیئنگ الیون میں کپتان شان مسعود، صائم ایوب، عبداللہ شفیق، بابر اعظم، سعود شکیل، محمد رضوان، سلمان علی آغا، ساجد خان، حسن علی، میر حمزہ اور عامر جمال شامل ہیں۔

پاکستان اور آسٹریلیا کے درمیان تین ٹیسٹ میچوں کی سیریز میں میزبان ٹیم کو دو صفر کی برتری حاصل ہے۔