سپریم کورٹ کے فیصلے کے خلاف نظرثانی کی اپیل کریں گے: بیرسٹر گوہر

سپریم کورٹ کے فیصلے کے بعد تحریک انصاف کے چیئرمین بیرسٹر گوہر علی خان نے میڈیا سے گفتگو کرتے ہوئے بتایا کہ ‘وہ فیصلے کے خلاف نظرثانی کی اپیل کریں گے۔‘
سنیچر کی رات انہوں نے مزید کہا کہ ’سپریم کورٹ کے متنازع فیصلوں میں آج ایک نئے فیصلے کا اضافہ ہوا ہے، اب پی ٹی آئی کے امیدوار آزاد حیثیت سے الیکشن میں حصہ لیں گے۔‘

’اس فیصلے سے ہماری مخصوص نشستیں چلی گئی ہیں، ہمارے امیدواروں کے انتخابی نشانات بھی مختلف ہوں گے، تکنیکی بنیادوں پر کیس کا فیصلہ ہوا ہے۔‘
چیئرمین پی ٹی آئی کا مزید کہنا تھا کہ ‘سپریم کورٹ میں جن 14 افراد کی بات کی گئی ان میں سے ایک بھی ہماری پارٹی سے نہیں تھا۔‘
ان کا کہنا تھا کہ ’پارٹی کے پاس انتخابی نشان ’بلا‘ رہے یا نہ رہے عوام بانی پی ٹی آئی عمران خان کی آواز پر ووٹ دیں گے۔‘

’ہم اپنے امیدواروں کی نئی فہرستیں تیار کریں گے اور ان کی انتخابی مہم چلائیں گے، ہم اپنے امیدواروں کو نئے انتخابی نشانات کے ساتھ سامنے لائیں گے۔‘
تحریک انصاف کی قانونی ٹیم کے سینیئر رکن حامد خان کا کہنا تھا کہ ’سپریم کورٹ کے فیصلے سے سخت مایوسی ہوئی ہے۔‘
’سیاسی جماعتوں کو اس سے سبق سیکھنا چاہیے، جو آج ایک پارٹی کے ساتھ ہو رہا ہے وہ کل دوسری پارٹیوں کے ساتھ ہوگا۔‘
انہوں نے کہا کہ ’دیگر سیاسی جماعتوں کے مقابلے میں تحریک انصاف کے انٹرا پارٹی انتخابات زیادہ شفاف تھے۔‘
تحریک انصاف کے وکیل سینیٹر علی ظفر نے کہا کہ ‘تاریخ ہی اب اس فیصلے پر اپنا فیصلہ کرے گی۔‘