نواز شریف کی اپنے آبائی حلقے میں ریلی، نمک پارے اور سموسوں سے تواضع

پاکستان مسلم لیگ ن کے قائد نواز شریف نے لاہور میں اپنے آبائی حلقہ این اے 130 میں انتخابی ریلی کی قیادت کی ہے۔

نواز شریف منگل کی سہ پہر ساڑھے تین بجے جاتی امرا سے براستہ رنگ روڑ ٹیکسالی پہنچے۔ یہاں ان کا استقبال آتش بازی اور پھول کی پتیوں سے کیا گیا۔ مریم نواز بھی ان کے ہمراہ تھیں۔

موہنی روڑ سے نواز شریف کا قافلہ کارکنوں کے جم غفیر میں سست روی سے کریم پارک کی طرف روانہ ہوا۔ یہاں سے اسی حلقے میں پنجاب کی صوبائی اسمبلی کے امیدوار بلال یسین نے ڈرائیونگ سنبھال لی۔ کارکنوں کی ایک بڑی تعداد نواز شریف کی گاڑی کے ساتھ پیدل ہی چلتی رہی۔

نواز شریف اس سے قبل کبھی بھی اپنے حلقے میں انتخابی مہم کے لیے ریلی کی شکل میں نہیں آئے۔ اس حلقے میں ریلی کی روایت مریم نواز نے اس وقت شروع کی جب نواز شریف کو سپریم کورٹ نے نااہل کیا تو ان کی اہلیہ کلثوم نواز اس حلقے سے ضمنی انتخابات میں ن لیگ کی امیدوار بنیں۔

مریم نواز نے اس حلقے میں 10 دن تک روانہ ریلیاں نکالیں اور جگہ جگہ خطاب کیے۔ تاہم منگل کو نکلنے والی ریلی میں نواز شریف اور مریم نواز صرف ایک مرتبہ گاڑی سے باہر نکلے اور کارکنوں کے نعروں کا جواب ہاتھ ہلا کر دیا۔ انہوں نے ریلی کے روٹ پر کوئی تقریر نہیں کی۔

جب موہنی روڑ پر بلال یسین نے ڈرائیونگ سنبھالی تو اس وقت باہر سے کسی نے سموسے اور نمک پارے گاڑی کے اندر پکڑائے۔

مریم نواز نے اپنے ایکس اکاؤنٹ پر ان لمحات کا ایک ویڈیو کلپ بھی شیئر کیا جب نواز شریف نے لفافے سے نمک پارے نکال کر بلال یسین کو دیے۔ مریم نواز نے ایکس پر لکھا کہ ’نمک پارے اور سموسے بہت خستہ تھے، یہ ہوتا ہے لاہور میں ریلی نکالنے کا فائدہ۔‘

لاہور کے حلقہ این اے 130 میں اس مرتبہ نواز شریف کی مدمقابل تحریک کی امیدوار یاسمین راشد ہیں جو اس وقت نو مئی کے مقدمات میں اسیری کے ایام گزار رہی ہیں۔ سنہ 2013 کے انتخابات میں وہ اسی حلقے سے نواز شریف کے مدمقابل تھیں تو وہ ایک بڑے مارجن سے یہ الیکشن ہار گئی تھیں۔

یہ حلقہ ٹیکسالی، گنج بخش ٹاؤن، اسلام پورہ اور بند روڑ کے گنجان آباد علاقوں پر مشتمل ہے۔ اور نواز شریف نے اپنی پارلیمانی سیاست کا آغاز اسی حلقے سے سنہ 1985 میں کیا تھا اور وہ آج تک اس حلقے سے الیکشن نہیں ہارے۔

اس ریلی کے لیے ن لیگ نے 31 مقامات کا روٹ جاری کیا تھا تاہم ٹھیک ساڑھے چھ بجے 12 کے قریب استقبالیہ کیمپوں کا دورہ کر کے ریلی ضلع کچہری آوٹ فال روڑ پر نکلی تو اسی وقت اسے ختم کر دیا گیا۔

حلقہ این اے 130 میں دو صوبائی حلقے پی پی 174 اور پی پی 173 ہیں۔ بلال یسین 174 جبکہ میاں مرغوب 173 سے ن لیگ کے امیدوار ہوں گے۔ مسلم لیگ ن کے مطابق یہ حلقہ پی پی 174 کا انتخابی دورہ تھا جبکہ جمعرات کو نواز شریف دوبارہ پی پی 173 میں انتخابی ریلی کی قیادت کریں گے۔