جدہ - - - - زیورات کی دکان سے دو مرتبہ چوری کرنے والا معتمر گرفتار ہوگیا۔ کنگ عبد العزیز انٹر نیشنل ایئر پورٹ معتمر کو جدہ پولیس کے حوالے کردیا ہے۔ المدینہ اخبار کی تفصیلات کے مطابق تیونس سے تعلق رکھنے والامعتمر 1435ھ کے دوران الکندرہ محلے میں واقع سونا اور زیورات کی دکان سے چوری کرنے میں کامیاب ہوگیا تھا۔ اس وقت تفتیشی اداروں نے چوری کی شناخت نہیں کی تھی البتہ جائے وقوعہ سے اس کے فنگر پرنٹ حاصل کرلئے تھے۔ بعد ازاں اس نے گزشتہ سال 1437ھ میں دوبارہ حی الصفا میں واقع زیورات کی دکان سے دوسری مرتبہ چوری کی۔ تفتیشی اداروں نے فنگرپرنٹ حاصل کرکے شناخت کرلی اور سعودی عرب کی تمام سرحدی چوکیوں میں اسے مطلوب افراد کی فہرست میں شامل کرلیا۔ امسال تیونسی معتمر پھر عمرہ کرنے کی غرض سے جدہ ایئرپورٹ پہنچا تو فنگر پرنٹ لیتے وقت اس کا پرانا ریکارڈ نکل آیا۔ ایئرپورٹ حکام نے اسے روک لیا اور جدہ پولیس کے حوالے کردیا۔
