مدینہ ہیلتھ سینٹر نے مسجد نبوی کے صحنوں میں حجاج کو گرمی سے بچانے کے لیے مختلف اقدامات کا آغاز کردیا ہے۔
سبق ویب کے مطابق مدینہ ہیلتھ سینٹر نے روزانہ صبح دس بجے سے شام چار بجے تک شدید گرمی میں بچاؤ کے حوالے سے آگاہی پیدا کرنے کے لیے ایک فیلڈ پروگرام کا آغاز کیا ہے جس کا مقصد یہ بتانا ہے کہ حجاج اور مسجد نبوی آنے والے زائرین گرمی سے کس طرح اپنا بچاؤ کریں۔
جمعے کی نماز سے قبل اور اس کے بعد حجاج اور مسجد نبوی آنے والے نمازیوں کو مسجد نبوی کے صحنوں میں چھتریاں، ہیلتھ بیگز، ٹھنڈے پانی کی بوتلیں برف کی تھیلیاں تقسیم کی گئیں جبکہ صحت کارکنان زائرین پر ٹھنڈے پانی کا سپرے بھی کرتے رہے تاکہ دھوپ کی تمازت اور اس کے مابعد اثرات سے بچا جاسکے۔
مدینہ ہیلتھ سینٹر نے وضاحت کی کہ اس اقدام کا مقصد مسجد نبوی آمد ورفت کے وقت حجاج کو گرمی کی شدت سے بچانا اور اس حوالے سے آگاہی بھی پیدا کرنا ہے۔
