سعودی عرب میں ملازمت، نرسنگ سٹاف کے انٹرویوز رواں ماہ راولپنڈی اور لاہور میں

پاکستان میں اوورسیز ایمپلائمنٹ کارپوریشن (او ای سی) قابل اور تربیت یافتہ نرسوں کے انتخاب کے لیے اس ماہ واک اِن انٹرویوز کرے گی تاکہ انہیں سعودی عرب بھیجا جا سکے۔

پاکستان کے سرکاری خبر رساں ادارے اے پی پی نے مئی میں کہا تھا کہ سعودی عرب کو مختلف شعبوں میں نرسنگ سٹاف کی ضرورت ہے جن میں کارڈیک کیئر، ایمرجنسی، میڈیکل کیئر، اطفال، اہم نگہداشت، ہیموڈیالیسس، نوزائیدہ کی دیکھ بھال، آنکولوجی، سرجیکل کیئر اور انتہائی نگہداشت کے شعبہ جات شامل ہیں۔

او ای سی نے کہا تھا کہ وہ مملکت میں قابل اور تربیت یافتہ نرسیں بھیجے گا۔

اے پی پی کے مطابق ’تمام عملے کا انتخاب مختلف تاریخوں اور سٹیشنوں سے واک ان انٹرویوز کے ذریعے کیا جائے گا، 27 اور 28 جون کو شالیمار ٹاور ہوٹل جیل روڈ لاہور اور 2 اور 3 جولائی کو پرل کانٹی نینٹل ہوٹل راولپنڈی میں انٹرویوز ہوں گے۔‘

پاکستان نے مئی میں کہا تھا کہ حتمی انتخاب کے لیے صرف اہل خواتین کو ہی مدعو کیا جائے گا جن کے پاس نرسنگ میں بیچلر آف سائنس (4 سال) یا آر این کے بعد متعلقہ شعبے میں کم از کم دو سال کا تجربہ اور خواتین کی عمر 45 سے زیادہ نہ ہوگی۔

نرسوں کو کمپنی کی جانب سے سہولیات فراہم کی جائیں گی جیسے رہائش اور ٹرانسپورٹ، سعودی لیبر قانون کے مطابق وقت کے ساتھ معاوضہ، ایک سال کے بعد مفت واپسی کا ٹکٹ اور ہر سال 21 دن کی تنخواہ کی چھٹیاں ملیں گی۔

’امیدواروں کو اپنے ساتھ اصل ڈپلومے، شناختی کارڈ، سی وی اپ ڈیٹ شدہ دو عدد پاسپورٹ سائز کی تصویریں لانا ہوں گی۔‘

نرسوں کے لیے درخواست دینے کی آخری تاریخ 30 جون 2024 ہے۔

پاکستان اور سعودی عرب کے درمیان مضبوط تجارتی، دفاعی اور ثقافتی تعلقات ہیں۔ مملکت 27 لاکھ سے زیادہ پاکستانی تارکین وطن کا گھر ہے اور ترسیلات زر کا اہم ذریعہ ہے۔