سعودی عرب میں آج یکم اگست سے موسم گرما کا اختتام

سعودی ماہر موسمیات ڈاکٹر خالد الزعاق نے کہا ہے کہ موسمی نقشوں کے حساب سے آج یکم اگست سے سعودی عرب میں موسم گرما کا اختتام ہوگیا ہے۔

سبق ویب سائٹ کے مطابق انہوں نے کہا ہے کہ ’بعض علاقوں میں ابھی بھی موسم گرم محسوس ہوگا تاہم دن گزرنے کے ساتھ موسم اعتدال پر مائل ہونا شروع ہوگا‘۔

انہوں نے بتایا ہے کہ ’اگست کے آخری عشرے سے پہلے موسم سردی مائل ہونا شروع ہو گا‘۔

دوسری طرف محکمہ موسمیات نے کہا ہے کہ ’سعودی عرب میں الاحسا شہر ملک کا گرم ترین شہر ہے جہاں آج جمعرات کو درجہ حرارت 47 ڈگری ریکارڈ کی گئی ہے‘۔

’ملک کا سرد ترین علاقہ السودہ ہے جہاں 13 سینٹی گریڈ سے کم ڈگری ریکارڈ کی گئی ہے‘۔

محکمے نے کہا ہے کہ ’گرم ترین علاقوں میں دمام، الخرج، حفر الباطن، ریاض اور وادی الدواسر ہے جہاں 46 اور 45 ڈگری ریکارڈ کی گئی ہے‘۔

’جبکہ سرد علاقوں میں ابہا، باحہ، طائف، طریف اور القریات ہے جہاں 17 اور 18 ڈگری ریکارڈ ہوئی ہے‘۔