’پاک سعودی دوستی بھائی چارے کی اعلٰی مثال‘، یوم الوطنی پر پاکستان کا خیرسگالی کا پیغام
سعودی عرب کا یوم الوطنی ہر سال 23 ستمبر کو منایا جاتا ہے۔ (فوٹو: ایس پی اے)
پاکستان کے وزیراعظم شہباز شریف نے سعودی عرب کے قومی دن پر مبارکباد دیتے ہوئے کہا ہے کہ ’شاہ سلمان بن عبد العزیز اور شہزادہ محمد بن سلمان کی قیادت میں سعودی عرب اکیسویں صدی کے عظیم ملک کی حیثیت سے اُبھرا ہے۔‘
پیر کو وزیراعظم آفس کی جانب سے جاری بیان کے مطابق شہباز شریف نے اپنے پیغام میں کہا کہ سعودی عرب کا وژن 2030 دنیا بھر کے لیے مثالی نمونہ ہے۔
’آج کے دور میں سعودی عرب کاروبار، ٹیکنالوجی، معیشت اور دیگر شعبوں میں ترقی پزیر ممالک کی مثالی قیادت کر رہا ہے۔‘
ان کا مزید کہنا تھا کہ پاکستان کی معیشت کے حالیہ استحکام میں سعودی عرب کے تعاون کے لیے پوری قوم مشکور ہے۔
’حالیہ قیادت کی سربراہی میں سعودی عرب نے ترقی کی نئی منازل طے کی ہیں‘
وفاقی وزیرداخلہ محسن نقوی نے بھی سعودی عرب کے قومی دن پر مبارکباد دیتے ہوئے کہا ہے کہ پاکستان اور سعودی عرب کے سفارتی تعلقات، دوستی، محبت اور بھائی چارے کی اعلیٰ مثال ہے۔
سعودی عرب کا یوم الوطنی ہر سال 23 ستمبر کو منایا جاتا ہے۔ گذشتہ برس کی طرح اس مرتبہ بھی قومی دن ’ہم خواب دیکھتے ہیں اور اسے حقیقت بناتے ہیں‘ کے سلوگن کے تحت منایا جا رہا ہے۔
پیر کو وزارت داخلہ کی جانب سے جاری بیان میں کہا گیا ہے کہ ’وزیر داخلہ محسن نقوی نے شاہ سلمان بن عبدالعزیز، ولی عہد محمد بن سلمان، شاہی خاندان اور سعودی عرب کے عوام کو دل کی اتھاہ گہرائیوں سے نیک خواہشات اور خیرسگالی کا پیغام دیا ہے۔‘
انہوں نے کہا کہ ’حجاز مقدس مسلمانوں کی عقیدت کا محور اور روحانیت کا بنیادی مرکز ہے۔‘
ان کا کہنا تھا کہ پاکستان اور سعودی عرب کے عوام مذہبی اور برادرانہ رشتوں سے جڑے ہوئے ہیں۔
محسن نقوی کے مطابق سعودی عرب نے پاکستان کا ہمیشہ مشکل وقت میں ساتھ دیا۔
انہوں نے مزید کہا کہ حالیہ قیادت کی سربراہی میں سعودی عرب نے ترقی کی نئی منازل طے کی ہیں۔
’اسلام اور مسلمانوں کی خدمت کے لیے سعودی عرب کے شاہی خاندان کی خدمات کو فراموش نہیں کیا جا سکتا۔‘
انہوں نے کہا کہ پاکستان اور سعودی عرب کے مابین گہرے اور دیرینہ تعلقات ہمیشہ قائم و دائم رہیں گے۔
’آج کا دن سعودی عرب کی تاریخ کا ایک یادگار دن ہے‘
قومی اسمبلی کے سپیکر ایاز صادق نے سعودی عرب کے قومی دن پر خادم الحرمین الشریفین شاہ سلمان بن عبدالعزیز، ولی عہد محمد بن سلمان اور سعودی عوام کو مبارکباد پیش کی ہے۔
انہوں نے کہا کہ آج کا دن سعودی عرب کی تاریخ کا ایک یادگار دن ہے۔
’سعودی عرب نے قلیل عرصے میں ترقی اور استحکام کے سفر میں نمایاں منازل طے کی ہیں۔‘
سپیکر قومی اسمبلی نے کہا کہ ’پاکستان اور سعودی عرب کے مابین تاریخی برادرانہ تعلقات باہمی اعتماد اور اسلامی بھائی چارے پر مبنی ہیں۔‘
ان کا مزید کہنا تھا کہ پاکستان کی عوام سعودی عرب کے ساتھ گہری وابستگی رکھتے ہیں۔
’پاکستان سعودی عرب کی خوشیوں میں برابر کا شریک ہے، دونوں برادر ممالک کی عوام کے دل ایک ساتھ دھڑکتے ہیں۔‘
انہوں نے کہا کہ ’دونوں برادر ممالک نے ہمیشہ ہر مشکل وقت میں ایک دوسرے کا ساتھ دیا ہے، سعودی عرب اور پاکستان کے لازوال رشتہ کے دوام کے لیے دعاگو ہوں۔‘
