’بگ باس او ٹی ٹی‘ کی اداکارہ ثنا سلطان نے مدینہ میں نکاح کر لیا

انڈیا کے معروف ریالٹی شو ’بگ باس او ٹی ٹی‘ میں حصہ لینے والی انڈین اداکارہ ثناء سلطان نے محمد واجد سے شادی کر لی ہے۔

این ڈی ٹی وی کے مطابق انڈین اداکارہ اور سوشل میڈیا انفلوئنسر ثناء سلطان کے نکاح کی تقریب مدینہ میں ہوئی جس کی تصاویر سوشل میڈیا پر وائرل ہو رہی ہیں۔

سعودی عرب کے شہر مدینہ میں منعقد ہونے والی نکاح کی یہ تقریب محدود نوعیت کی تھی جس میں ثناء اور واجد کے چند قریبی لوگوں نے شرکت کی۔

ثناء سلطان نے اپنی شادی کی تقریب کی تصاویر انسٹاگرام اکاؤنٹ پر شیئر کی ہیں اور ساتھ ہی ایک طویل کیپشن بھی لکھا ہے۔

اداکارہ نے پوسٹ میں اپنے شوہر کے بارے میں زیادہ معلومات تو نہیں دیں مگر چند الفاظ کے ذریعے اپنی خوشی کا بھرپور اظہار کیا ہے۔

ثناء سلطان نے اپنے کیپشن میں لکھا ہے کہ ’الحمدللہ! میں عاجزی اور خوشی کے ساتھ شیئر کر رہی ہوں کہ مجھے مدینہ جیسی پاکیزہ اور مقدس جگہ پر اپنے واجد جی کے ساتھ نکاح کی سعادت حاصل ہوئی ہے۔‘

ثناء مزید لکھتی ہیں کہ ’دوست سے جیون ساتھی بننے تک کا ہمارا سفر محبت، صبر اور ایمان کا ثبوت ہے۔‘

اس اعلان کے بعد ثناء سلطان کو ان کے دوستوں اور مداحوں کی جانب سے مبارکبادیں دینے کا سلسلہ بھی جاری ہے۔

اس کے علاوہ متعدد معروف شخصیات بھی اداکارہ کو نکاح کی مبارکبادیں دے رہی ہیں۔

ثناء سلطان نے انسٹاگرام پر اپنے نکاح کی ویڈیو بھی شیئر کی ہے۔

یاد رہے کہ ثناء سلطان نے ’بگ باس او ٹی ٹی تھری‘ میں شرکت کی تھی جس کے میزبان انیل کپور تھے۔

’بگ باس‘ ایک انڈین ٹیلی وژن شو ہے جو ٹی وی پر نشر ہوتا ہے جبکہ ’بگ باس او ٹی ٹی‘ ڈیجیٹل پلیٹ فارمز پر نشر ہونے والا شو ہے۔