ٹریفک خلاف ورزیوں پر 5 ہزار 4 سو موٹر سائیکلیں ضبط

سعودی محکمہ ٹریفک نے متعدد خلاف ورزیوں پر مختلف شہروں سے 5 ہزار 4 سو 68 موٹر سائیکلیں ضبط کی ہیں۔

سبق ویب سائٹ کے مطابق 12 جنوری 2025 سے 18 جنوری 2025 تک مختلف شہروں سے موٹر سائیکلیں ضبط ہوئی ہیں۔

محکمہ ٹریفک نے کہا ہے کہ ’سب سے زیادہ موٹر سائیکلیں ریاض ریجن میں ضبط ہوئی ہیں جن کی تعداد 2878 ہے‘۔

’دوسرے نمبر پر جدہ ہے جہاں سے 984 موٹر سائیکلیں ضبط ہوئی ہیں‘۔

محکمہ ٹریفک نے کہا ہے کہ’ مکہ مکرمہ میں 949، مدینہ منورہ میں 102، مشرقی ریجن میں 256، عسیر میں 84، حائل میں 28، قصیم میں 52 اور جازان میں 60 موٹر سائیکلیں ضبط ہوئی ہیں‘۔

محکمہ ٹریفک نے کہا ہے کہ ’ٹریفک قوانین کی خلاف ورزی پر موٹر سائیکل ضبط ہوگی اور یہ کسی بھی حال میں ناقابل واپسی ہے‘۔

محکمے نے موٹر سائیکل چلانے والوں کو سختی کے ساتھ ہدایت کی ہے کہ وہ ٹریفک قوانین کی پابندی کریں۔