جنوبی لبنان پر اسرائیلی حملے میں 24 افراد زخمی: وزارت صحت
لبنان کی وزارت صحت کے مطابق فضائی حملے میں سات افراد زخمی ہوئے ہیں۔ (فوٹو: اے ایف پی)
جنوبی لبنان میں منگل کو اسرائیل کے حملے میں 24 افراد زخمی ہوئے ہیں۔
فرانسیسی خبر رساں ادارے اے ایف پی کے مطابق اسرائیلی حملہ لبنان میں چھ ہفتوں سے جاری جنگ بندی کے باوجود کیا گیا۔
لبنان کی وزارت صحت کے مطابق دو فضائی حملوں میں 24 افراد زخمی ہوئے ہیں۔
وزارت صحت کے ترجمان کا کہنا تھا کہ ’اسرائیلی دشمن کی جانب سے آج شام نباتہہ میں حملے کے سبب 20 زخمی ہوئے زوطر پر ایک دوسرے حملے میں 4 افراد زخمی ہوئے۔‘
خیال رہے لبنان سے اسرائیلی فوج کے انخلا کی 60 روزہ ڈیڈلائن ختم ہونے کے آخری دن اتوار کو اسرائیلی فوج نے لبنان کے جنوبی علاقے میں مظاہرین پر فائرنگ کرکے از کم 22 افراد کو ہلاک جبکہ 40 سے زائد کو زخمی کر دیا تھا۔
مظاہرین اسرائیل اور لبنان کے درمیان جنگ بندی کے 60 روز بعد بھی جنوبی سرحدی قصبوں سے اسرائیلی فورسز کے انخلاء میں ناکامی کے خلاف احتجاج کر رہے تھے
اپنے گھروں کو واپس جانے کے خواہش مند مظاہرین نے ایک روز قبل سڑک پر اسرائیلی فورسز کی جانب سے کھڑی کی گئی رکاوٹیں عبور کرنے کی کوشش کی تھی تو اسرائیلی فورسز نے ان پر فائرنگ کر دی۔
یہ مظاہرین 60 دن کی ڈیڈلائن گزر جانے کے باوجود اسرائیلی فوج کے انخلاء میں ناکامی کے خلاف احتجاج کر رہے تھے۔ انخلا کی ڈیڈ لائن 26 جنوری اتوار کی صبح ساڑھے چار بجے ختم ہو گئی تھی۔
