السعودیہ کے نیٹ ورک میں توسیع، 11 نئے مقامات شامل ہوں گے

سعودی فضائی کمپنی السعودیہ نے اس سال اپنے نیٹ ورک میں  توسیع کا اعلان کیا ہے، گیارہ نئے مقامات شامل کیے جا رہے ہیں۔

ان نئی منزلوں میں ویانا( آسٹریا)، وینس (اٹلی)، لارنکا ( قبرص)، ایتھنز، ہیرا کلیون( یونان)، نیس( فرانس) ، ملاگا( سپین)، بالی ( انڈونیشیا)، انطالیہ (ترکیہ)، صلالہ( عمان) اورالعالمین( مصر)، شامل ہیں۔

یہ مقامات چار براعظموں میں 100 سے زیادہ مقامات کے السعودیہ کے موجودہ نیٹ ورک میں شامل ہیں۔

یاد رہے کہ گزشتہ برس السعودیہ کے بین الاقوامی مسافروں کی تعداد میں 16 فیصد اضافہ ہوا ہے۔

 نیٹ ورک میں توسیع سعودی عرب کی سیاحتی حکمت عملی کے مطابق ہے جس کا مقصد 2030 تک 150 ملین سیاحوں کو راغب کرنا، 1.6 ملین ملازمتیں پیدا کرنا اور جی ڈی پی میں سیاحت کے شیئر کو بڑھانا ہے۔

السعودیہ کے ڈائریکٹر جنرل ابراہیم العمر نے کہا’ گزشتہ برس کی آپریشنل کامیابی کے بعد ہم نے 2025 کےلیے ایک سٹریٹجک منصوبہ نافذ کیا ہے تاکہ بین الاقوامی سفر کی بڑھتی ہوئی ڈیمانڈ کو پورا کیا جا سکے۔‘

علاوہ ازیں السعودیہ اپنی آپریشنل صلاحیت کو بڑھانے کےلیے آئندہ برسوں میں 118 نئے طیارے حاصل کرنے کا منصوبہ رکھتی ہے۔