یوکرین جنگ، صدر ٹرمپ روسی ہم منصب سے سعودی عرب میں ملاقات کریں گے

امریکہ کے صدر ڈونلڈ ٹرمپ اپنے روسی ہم منصب ولادیمیر پوتن سے سعودی عرب میں ملاقات کریں گے۔

عرب نیوز کے مطابق صدر ٹرمپ نے ملاقات کے حوالے سے یہ اعلان روسی صدر ولادیمیر پوتن کے ساتھ ٹیلی فون پر 90 منٹ کی گفتگو کے بعد کیا جس میں انہوں 3 سال سے جاری یوکرین جنگ کے خاتمے پر بات چیت کی۔

صدر ٹرمپ نے اپنے دفتر میں صحافیوں کو بتایا کہ ’بالآخر ہماری ملاقات کا امکان ہے۔ بلکہ ہماری یہ توقع ہے کہ وہ یہاں آئیں گے اور میں وہاں جاؤں گا، اور شاید پہلی مرتبہ ہم سعودی عرب میں ملاقات کریں۔ ہم سعودی عرب میں ملیں گے اور دیکھتے ہیں اگر کچھ طے پا جائے۔‘

صدر ٹرمپ نے سعودی ولی عہد شہزادہ محمد بن سلمان کے حوالے سے کہا کہ ’ہم ولی عہد کو جانتے ہیں اور میرے خیال میں ملاقات کے لیے یہ بہت اچھا مقام ہوگا۔‘

امریکی صدر نے مزید کہا کہ ملاقات کی تاریخ فی الحال طے نہیں پائی لیکن ملاقات ہو گی اور ’مستقبل میں زیادہ دیر سے نہیں ہو گی۔‘

اس سے قبل کریملن کے ترجمان ڈمیٹری پیسکوو نے کہا تھا کہ صدر پوتن نے یوکرین تنازعے پر بات چیت کے لیے ڈونلڈ ٹرمپ اور ان کی انتظامیہ کے عہدیداروں کو ماسکو کے دورے کی دعوت دی ہے۔

ترجمان نے کہا ’روسی صدر نے امریکہ کے صدر کو ماسکو آنے کی دعوت دی ہے اور امریکی عہدیداروں کا روس میں استقبال کرنے اور یوکرین کے معاملے پر تصفیے سمیت باہمی دلچسپی کے شعبوں پر (بات چیت کے لیے) آمادگی ظاہر کی ہے۔‘

بدھ کو صدر ٹرمپ نے کہا تھا کہ امن مذاکرات ’فوری طور‘ پر شروع ہو جائیں گے اور شاید یوکرین کو اپنی زمین واپس نہ مل سکے۔