سعودی پروجیکٹ کے تحت یمن میں ایک ہفتے کے دوران مزید 861 باردودی سرنگیں صاف

سعودی عرب کے مسام پروجیکٹ کے تحت گزشتہ ہفتے کے دوران یمن کے مختلف علاقوں میں مزید 861 بارودی سرنگوں کو صاف کیا گیا ہے۔

عرب نیوز نے ایس پی اے کے حوالے سے بتایا سعودی پروجیکٹ کی خصوصی ٹیموں نے 5 اینٹی پرسنل بارودی سرنگیں، 810 بغیر دھماکے کی ڈیوائسز، 44 اینٹی ٹینک بارودی سرنگیں اور دو دیسی ساختہ ڈیوائسز کو تباہ کیا ہے۔

پروجیکٹ کے منیجنگ ڈائریکٹر اسامہ القصبی نے بتایا ’ 2018 میں مسام پروجیکٹ کے آغاز سے اب تک یمن میں حوثیوں کی بچھائی گئی چارلاکھ 82 ہزار637 بارودی سرنگوں کو تباہ کیا جا چکا ہے۔‘

مارب، عدن، الجوف، لحج، صنعا، صعدہ، البیضا، الضالع، شبوہ، تعز، الحدیدہ اور دیگر علاقوں سے بارودی سرنگیں صاف کی گئی ہیں۔

حوثیوں کی جانب سے یمن بھر میں نصب کی جانے والی بارودی سرنگوں سے بچوں، خواتین اور معمرافراد سمیت معصوم شہریوں کی زندگیوں کو شدید خطرہ لاحق ہے۔ 

واضح رہے کہ حوثی باغیوں کی جانب سے 1.2 ملین سے زیادہ بارودی سرنگیں بچھائی گئی ہیں جس کے باعث سیکڑوں معصوم شہریوں کے زخمی اور ہلاک ہونے کے واقعات رونما ہوئے ہیں۔

مسام پروجیکٹ کا مقصد یمن کے مختلف شہری اور دیہی علاقوں، سڑکوں اور سکولوں کو بارودی سرنگوں سے صاف کرنا ہے تاکہ معصوم شہریوں کی محفوظ آمد ورفت اور انسانی امداد کی فراہمی کو آسان بنایا جا سکے۔

یہ پروجیکٹ مقامی انجینیئرز کی بھی تربیت اورانہیں جدید آلات فراہم کرتا ہے جبکہ باردودی سرنگوں کی زد میں آنے والے یمنی شہریوں کی بھی مدد کی جاتی ہے۔

مسام پروجیکٹ کے مطابق یمن میں بحران کے آغاز سے اب تک تقریبا 50 لاکھ افراد نقل مکانی پر مجبور ہوئے جن میں بیشتر بارودی سرنگوں کے باعث بے گھر ہوئے۔