اس موقع پر خطاب کرتے ہوئے پاکستان میں سعودی عرب کے سیفر نواف بن سعید المالکی نے کہا کہ مملکت سعودی عرب اور اسلامی جمہوریہ پاکستان کے مابین گہرا اور مضبوط رشتہ ہے۔ اور خادم حرمین شریفین شاہ سلمان بن عبدالعزیز کی جانب سے کھجوروں کا یہ خصوصی تحفہ پاکستانی بھائیوں کے لئے بھجوایا گیا ہے۔
چوہدری سالک حسین نے کہا کہ ہر سال کی طرح اس سال بھی سعودی حکومت نے پاکستانی عوام کے لئے کھجوروں کا تحفہ بھیجا ہے جیسے رمضان سے پہلے یا عید کے موقع پر ایک بھائی دوسرے بھائی کے گھر تحفہ بھجواتا ہے۔ جو اس بات کا ثبوت ہے کہ پاکستان اور سعودی عرب کے تعلقات ہمیشہ کی طرح آج بھی مضبوط ہیں اور مستقبل میں بھی مضبوط ہوں گے۔
انہوں نے کہا کہ کوئی بھی موقع ہو سعودی عرب ہمیشہ پاکستان کے ساتھ کھڑا ہوتا ہے۔
سعودی سفیر نواف بن سعید المالکی نے مزید کہا کہ روزے داروں کے لیے افطار پروگرام، اور کھجوروں کی تقسیم کا پروگرام ان منصوبوں کا حصہ ہے جنہیں خادم حرمین شریفین شاہ سلمان بن عبدالعزیز آل سعود نے رمضان المبارک کے مہینے میں پاکستان سمیت متعدد ممالک میں شروع کرنے کی ہدایات کیں۔
اُن کا کہنا تھا کہ اس پروگرام کا مقصد غریب اور نادار خاندانوں، بیواؤں اور یتیموں کی دیکھ بھال کرنا، انہیں خوشی و مسرت کے مواقع فراہم کرنا اور ان کی ضروریات کو پورا کرنا اور ضروری اشیائے خورد ونوش فراہم کرتے ہوئے غریب اور انتہائی ضرورت مند خاندانوں کی تکالیف کو کم کرنے میں مؤثر طریقے سے تعاون کر کے ان کے لیے مدد کا ہاتھ بڑھانا ہے۔
تقریب سے خطاب میں وفاقی وزیر مذہبی امور نے سعودی حکومت اور عوام کا شکریہ ادا کیا۔ فوٹو: وزارت مذہبی امور
سعودی سفیر نے کہا کہ خادم الحرمین شریفین کا کھجوروں کا تحفہ رمضان اور افطار پروگرام پورے مہینے میں پاکستان کے تمام صوبوں میں منعقد کیا جائے گا۔
سعودی حکومت اور عوام کی جانب سے دوستی اور اخوت کی علامت بننے والے اس پروگرام کے تحت20 ٹن کھجوریں 40 ہزار مستحق افراد کو پہنچائی جائیں گی، جبکہ افطار پروگرام سے 30 ہزار افراد مستفید ہوں گے۔
وفاقی وزیر مذہبی امور چوہدری سالک حسین نے خادم حرمین شریفین اور ولی عہد شہزادہ محمد بن سلمان کا وزیراعظم شہباز شریف، حکومت اور پاکستان کے عوام کی جانب سے سعودی مملکت کی طرف سے پاکستان میں ضرورت مندوں کی مسلسل مدد پر شکریہ ادا کرتے ہوئے کہا کہ یہ تحائف سعودی عرب کے عوام، اس کی حکومت، اس کی دانشمندانہ قیادت اور پاکستانی عوام کے درمیان اخوت اور خیر سگالی کے رشتے کی علامت ہیں۔
رمضان میں کون سی غذائیں کھائیں اور کن سے پرہیز کریں؟Node ID: 886626
