آسٹریلیا میں لڑکے کی بندوق سمیت جہاز میں سوار ہونے کی کوشش، مسافروں نے پکڑ لیا

آسٹریلیا میں مسافروں نے جمعرات کو شاٹ گن اور اسلحے سے لیس 17 سال کے ایک لڑکے کو اس وقت قابو کر لیا جب وہ میلبرن کے قریب ایئرپورٹ میں داخل ہونے کے بعد جہاز میں سوار ہونے کی کوشش کر رہا تھا۔

فرانسیسی خبر رساں ایجنسی اے ایف پی نے وکٹوریا پولیس کے سپرنٹنڈنٹ مائیکل ریڈ کے حوالے سے بتایا ہے کہ ’یہ لڑکا ایویلون ایئرپورٹ میں لگائی گئی حفاظتی باڑ میں موجود ایک سوراخ سے داخل ہو کر اس جہاز کے قریب پہنچ گیا جس میں 160 مسافر سوار تھے۔‘
سپرنٹنڈنٹ پولیس نے مزید کہا کہ ’وہ لڑکا ہوائی جہاز کے قریب پہنچا اور اس کے سامنے والی سیڑھیوں کے ذریعے اوپر چڑھ گیا۔‘
اس وقت مسافروں نے دیکھا کہ ایک شخص اسلحہ لے کر جہاز میں داخل ہونے جا  رہا ہے، ان میں سے تین مسافروں نے اس لڑکے کو قابو کرلیا۔ 
اس دوران کوئی شخص زخمی نہیں ہوا، اور پولیس نے لڑکے کو گرفتار کرلیا۔مائیکل ریڈ کے مطابق لڑکے کے پاس شاٹ گن اور آتشیں اسلحہ موجود تھا۔
واضح رہے کہ قنطاس کی بجٹ ایئرلائن ’جیٹ سٹار‘ کی یہ پرواز سڈنی کے لیے شیڈول تھی۔
سپرنٹنڈنٹ پولیس نے بتایا کہ پولیس انسداد دہشت گردی کے تفتیش کاروں کے ساتھ رابطے میں ہے، تاہم گرفتار ہونے والے لڑکے کے عزائم کے بارے میں کچھ کہنا قبل از وقت ہو گا۔
انہوں نے کہا کہ ’اس بارے میں کوئی شک نہیں کہ یہ مسافروں کے لیے ایک بہت ہی خوفناک واقعہ ثابت ہوتا۔‘
وکٹوریا پولیس کے سپرنٹنڈنٹ مائیکل ریڈ نے کہا کہ ’وکٹوریہ پولیس ان مسافروں کے دلیری کو سراہتی ہے جنہوں نے اس لڑکے کو بروقت قابو کرلیا۔‘
 لڑکا دوپہر کو پیش آنے والے واقعے میں تنہا دکھائی دیا اور پولیس کو اس بارے میں علم نہیں تھا۔