یوکرین کے ساتھ مذاکرات آئندہ ہفتے سعودی عرب میں ہوں گے: امریکہ

امریکی صدر ڈونلڈ ٹرمپ کے ایلچی برائے مشرق وسطیٰ سٹیو وٹکوف کا کہنا ہے کہ وہ روس کے ساتھ لڑائی ختم کرنے کے لیے فریم ورک پر یوکرین سے بات چیت کر رہے ہیں اور آئندہ ہفتے سعودی عرب میں یوکرین کی قیادت سے ملاقات طے ہے۔

برطانوی خبر رساں ایجنسی روئٹرز کے مطابق سٹیو وٹکوف نے وائٹ ہاؤس میں صحافیوں کو بتایا کہ ’ہم اب یوکرینیوں کے ساتھ ایک میٹنگ کے لیے بات چیت کر رہے ہیں۔ یہ (ملاقات) ممکنہ طور پر ریاض یا جدہ میں ہوگی۔‘

سعودی عرب میں ملاقات کا حوالہ دیتے ہوئے ڈونلڈ ٹرمپ کے ایلچی برائے مشرق وسطیٰ سٹیو وٹکوف نے کہا کہ ’میرے خیال میں امن معاہدے اور ابتدائی جنگ بندی کے لیے ایک فریم ورک تک پہنچنے کا منصوبہ ہے۔‘

یوکرین کے صدر ولادیمیر زیلنسکی نے کہا کہ یوکرین اور امریکی حکام کے درمیان طے شدہ مذاکرات سے ایک دن پہلے وہ آئندہ پیر کو سعودی عرب کا دورہ کریں گے۔

انہوں نے ایکس پر ایک پوسٹ میں بتایا کہ ’اس کے بعد، میری ٹیم اپنے امریکی شراکت داروں کے ساتھ کام کرنے کے لیے سعودی عرب میں رہے گی۔ یوکرین امن میں سب سے زیادہ دلچسپی رکھتا ہے۔‘

صدر ٹرمپ نے جمعرات کو کہا تھا کہ وہ سعودی عرب کا دورہ کریں گے۔ ان کا کہنا تھا کہ یہ دورہ اگلے ڈیڑھ ماہ کے دوران متوقع ہے۔

امریکی صدر ڈونلڈ ٹرمپ اور یوکرین کے صدر ولادیمیر زیلنسکی کے درمیان 28 فروری کو وائٹ ہاؤس میں سخت جملوں کا تبادلہ ہوا تھا تاہم، اس کے بعد سے دونوں رہنماؤں نے معدنیات کے حصول سے متعلق ایک معاہدے پر دوبارہ کام شروع کر دیا تھا۔

منگل کو کانگریس کے مشترکہ اجلاس سے خطاب کرتے ہوئے صدر ٹرمپ نے کہا تھا کہ انہیں ولادیمیر زیلنسکی کی جانب سے ایک خط موصول ہوا ہے جس میں انہوں نے کہا ہے کہ وہ ’جلد سے جلد مذاکرات کی میز پر آنے کے لیے تیار ہیں۔‘