بلوچستان میں میاں بیوی پانچ بچوں سمیت قتل، گھر جلا دیا گیا

بلوچستان کے ضلع صحبت پور میں زمین کے تنازع پر میاں بیوی اور ان کے پانچ بچوں کو قتل کرنے کے بعد گھر کو آگ لگا دی گئی۔

پولیس کا کہنا ہے کہ واقعہ بدھ اور جمعرات کی درمیانی شب صحبت پور سے تقریبا 35 کلومیٹر دور تھانہ آرڈی 238 کی حدود میں پٹ فیڈر کے علاقے گوٹھ دوران خان کھوسہ میں پیش آیا۔ یہ علاقہ ڈیرہ بگٹی کی تحصیل سوئی سے متصل ہے۔ 

ڈی ایس پی داؤد خان کھوسہ نے اردو نیوز کو بتایا کہ ’مسلح افراد نے مقامی قبائلی رہنما کے بزگر علی حسن شیخ کے گھر میں گھس کر اندھا دھند فائرنگ کی جس سے وہ، ان کی اہلیہ، چار بیٹے اور ایک بیٹی موقع پر ہی ہلاک ہو گئے۔‘

انہوں نے بتایا کہ بچوں کی عمریں دو سال سے لے کر 15 سال کے درمیان تھیں۔ 

ان کا یہ بھی کہنا تھا کہ ’حملہ آوروں نے جاتے ہوئے گھر کو آگ بھی لگا دی جس سے لاشیں جھلس گئیں۔‘  

ایس پی صحبت پور یوسف بھنگر نے بتایا کہ ’یہ واقعہ زمین کے تنازع پر پیش آیا ہے۔ اس سے قبل بھی اسی تنازع کی وجہ سے کئی اموات ہو چکی ہیں۔‘

ملزموں کی گرفتاری کے حوالے سے انہوں نے بتایا کہ ناکہ بندی کر لی گئی ہے اور ان کو تلاش کیا جا رہا ہے۔