سپیکر ایاز صادق مدینہ منورہ پہنچ گئے، مسجد نبوی میں حاضری دینگے
قونصل جنرل خالد مجید نے مدینہ ایئرپورٹ پر سپیکر کا خیرمقدم کیا۔ (فوٹو:: پاکستان قونصلیٹ )
پاکستان کی قومی اسمبلی کے سپیکر سردار ایاز صادق اور ارکان پارلیمنٹ کا وفد منگل کو ریاض سے مدینہ منورہ پہنچ گیا۔
سپیکر ایاز صادق اور ارکان پارلیمنٹ مسجد نبوی میں نوافل کی ادائیگی اور روضہ رسول پر حاضری کے بعد عمرے کے ادائیگی کے لیے مکہ مکرمہ روانہ ہوں گے۔
قونصل جنرل جدہ خالد مجید نے مدینہ منورہ کے امیر محمد بن عبدالعزیز ایئرپورٹ پر سپیکر ایاز صادق اور ان کے وفد کا خیرمقدم کیا۔
قبل ازیں سپیکر ایاز صادق نے گورنر ریاض شہزادہ فیصل بن بندر بن عبدالعزیز، مجلس شوری کے چیئرمین شیخ ڈاکٹر عبداللہ آل الشیخ اور مفتی اعظم شیخ عبدالعزیز آل الشیخ سے ملاقاتیں کیں۔
سپیکر ایاز صادق نے ملاقاتوں میں مملکت میں پرتپاک استقبال اور شاندار مہمان نوازی کو سراہتے ہوئے اسے دونوں ممالک کے مابین تاریخی و برادرانہ تعلقات کا ذکرکیا، اسے عالم اسلام میں یکجہتی اور استحکام کے لیے مملکت کے قائدانہ کردار کو اہم قرار دیا۔
