تہران...آرمی چیف جنرل قمر جاوید باجوہ نے ایران کی سیاسی و عسکری قیادت سے ملاقات کی ہے ۔ اس موقع پر انہوں نے کہا کہ دہشت گرد ی ہمارا مشترکہ دشمن ہے ۔پاک، ایران بارڈر امن اور دوستی کا بارڈر ہے۔ دہشت گردوں کی جانب سے پاک، ایران بارڈرکو نقصان نہیں پہنچنے دیں گے۔آئی ایس پی آر کے مطابق آرمی چیف ایک روزہ سرکاری دورے پر پہنچے تو جنرل اسٹاف ہیڈ کوارٹرز آمد پر انہیں گارڈ آف آنردیا گیا۔ جنرل باجوہ نے ایرانی چیف آف جنرل اسٹاف سے ملاقات کی۔بعد ازاں وزارت خارجہ میں وزیرخارجہ جواد ظریف اور ایوان صدر میں صدر حسن روحانی سے بھی ملاقات کی۔ ایران کی سول وعسکری قیادت سے ملاقاتوں میں افغان صورتحال، داعش کے بڑھتے خطرے سمیت پاک، ایران بارڈرسیکیورٹی پر بات چیت کی گئی ۔ایرانی قیادت نے علاقائی امن اور اس کے لئے پاکستان کے مثبت کردار کے ساتھ دہشت گردی کے خلاف جنگ میں پاکستان کی قربانیوں اور کامیابیوں کو سراہا۔
