کوریا میں کشیدگی پیدا کرنے پر امریکہ کو روسی انتباہ

ماسکو۔۔۔ روس نے جزیرہ نمائے کوریا میں کشیدہ اقدامات  پر امریکہ کو سخت خبردار کیا ہے۔ نائب وزیر خارجہ ایگور موگولوف نے اپنے ایک بیان میں کہا ہے کہ ایسی حالت میں کہ شمالی کوریا نے گزشتہ  2 ماہ کے دوران  میزائل و جوہری تجربہ نہیں کیا ، روس جزیرہ نمائے کوریا میں امریکہ اور اس کے اتحادیوں کی مشترکہ فوجی مشقوں اور فوجی نقل و حرکت کو صحیح نہیں سمجھتا۔انھوں نے کہا کہ شمالی کوریا کی جانب سے2 ماہ کے دوران کوئی اقدام نہیں کئے جانے کے باوجود ایسا نہیں لگتا کہ امریکہ نے کشیدگی کم کرنے کوشش کی ہے بلکہ وہ فوجی مشقیں انجام دے کر صورتحال کو مسلسل کشیدہ بنائے ہوئے ہے۔ نائب وزیر خارجہ نے کہا کہ ان کا ملک شمالی کوریا کو مسلسل اس بات پر رضامند رکھنے کی کوشش کر رہا ہے کہ وہ کوئی نیا میزائل یا جوہری تجربہ نہ کرے۔