ایلس پیری، ویمنز کرکٹر آف دی ائیر

دبئی: آسٹریلین ویمنز آل راونڈر ایلس پیری نے انٹرنیشنل کرکٹ کونسل (آئی سی سی) کا ویمنز کرکٹر آف دی ایئر ایوارڈ اپنے نام کر لیا جبکہ ایمی سیٹرتھویٹ ون ڈے اور بیتھ مونی ٹی ٹونٹی پلیئر آف دی ایئر قرار پائیں۔جنوری میں سابق انگلش کپتان ریکائل فلنٹ کے انتقال کے بعد آئی سی سی نے سالانہ ایوارڈ کو ان کے نام سے منسوب کرنے کا اعلان کیا تھا۔گزشتہ 14 ماہ کے دوران عمدہ آل راونڈ کارکردگی کا مظاہرہ کرنے پر ایلس پیری کو آئی سی سی ویمنز کرکٹر آف دی ایئر ایوارڈ سے نوازا گیا۔ انہوں نے عمدہ کارکردگی دکھاتے ہوئے 905 رنز بنائے اور 22 وکٹیں حاصل کیں۔ا یلس نے نیوزی لینڈ کی ایمی سیٹرتھویٹ اور ہندکی ہرمن پریت کور کو شکست دے کر ٹائٹل جیتنے کا اعزاز حاصل کیا۔ نیوزی لینڈ کی ایمی سیٹرتھویٹ ون ڈے اور آسٹریلیا کی بیتھ مونی ٹی ٹوئنٹی پلیئر آف دی ایئر ایوارڈز کی حقدار ٹھہریں۔ایلس پیری نے اپنے بیان میں کہا کہ ریکائل فلنٹ ایوارڈ جیتنا میرے لیے باعث فخر ہے اور مستقبل میں بھی عمدہ کارکردگی کے تسلسل کو برقرار رکھتے ہوئے مزید ایوارڈز جیتنے کی کوشش کروں گی۔اس کے ساتھ ساتھ ایوارڈ کی تقریب کے موقع پر آئی سی سی نے سال کی بہترین ون ڈے اور ٹی ٹوئنٹی ویمنز ٹیموں کا اعلان کر دیا جس میں پاکستان کی کوئی بھی کھلاڑی دونوں ٹیموں میں جگہ حاصل نہ کر سکی۔آئی سی سی کی اعلان کردہ ٹیم میں انگلینڈ کی ہیتھرنائٹ کو ون ڈے اور ویسٹ انڈیز کی اسٹیفنی ٹیلر کو ٹی ٹوئنٹی ٹیم کا کپتان مقرر کیا گیا جبکہ ہند کی اسپنر اکتا بشت واحد کھلاڑی ہیں جو دونوں ٹیموں میں جگہ بنانے میں کامیاب رہیں۔ویمنز ون ڈے ٹیم آف دی ایئر میں ہیتھرنائٹ، ٹامی بیوماونٹ، میگ لیننگ، متھالی راج، ایمی سیٹرتھویٹ، علیزے پیری، سیرا ٹیلر، ڈین وان نائیکرک، مریزن کیپ، اکتا بشت اور ایلکس ہارٹلے شامل ہیں۔سال کی بہترین ویمنز ٹی ٹوئنٹی ٹیم کپتان ا سٹیفنی ٹیلر، بیتھ مونی، ڈینی وائٹ، ہرمن پریت کور، سوفی ڈیوائن، دیندرا ڈوٹن، ہیلے ولیمز، میگن سکٹ، آماندا جیڈ ویلنگٹن، لی تاہو ہو اور اکشتا بشت پر مشتمل ہے۔