پہلا ٹی ٹوئنٹی : پاکستان نے ویسٹ انڈیز کو 143 رنز سے ہرادیا
کراچی : نیشنل اسٹیڈیم میں پاکستان نے ویسٹ انڈیز کو 60رنز پر آوٹ کرکے پہلا ٹی ٹوئنٹی143رنز سے جیت لیا۔ 3 ٹی ٹوئنٹی سیریز کے پہلے میچ میں ویسٹ انڈیز کے کپتان جیسن محمد نے ٹاس جیت کر پہلے فیلڈنگ کا فیصلہ کیا جو مہمان ٹیم کیلئے ڈروانا خواب بن گیا جب پاکستانی بلے بازوں نے مقررہ 20 اوورز میں 203 رنز بنالئے۔ فخرزمان اور بابراعظم نے اننگز کا آغاز کیا، فخر نے پہلے ہی اوور میں سیموئل بدری کو 3 چوکےلگاکر 13 رنز بنائے ۔بابر اعظم اور فخرزمان نے 5 اوورز میں 46 رنز کا جارحانہ آغاز فراہم کیا لیکن 5ویں اوور کی آخری گیند پر ریاد ایمرٹ نے بابر اعظم کو 17رنز پر آوٹ کردیا۔ڈیبیو کھیلنے والے حسین طلعت کی غلط کال پر فخرزمان رن آوٹ ہو گئے۔ انہوںنے 24 گیندوں پر ایک چھکے اور 6 چوکوں کی مدد سے 39 رنز بنائے۔کپتان سرفراز احمدبیٹنگ کےلئے آئے اور حسین طلعت کے ساتھ 85 رنز کی عمدہ شراکت قائم کی۔ حسین طلعت نے 37 گیندوں پر 41 رنز بنائے۔ سرفراز احمد کی 38 رنز کی اننگزمیں ایک چھکا اور 4 چوکے شامل تھے۔ ڈیبیو کرنے والے دوسرے کھلاڑی آصف علی دوسری گیند پر غلط شارٹ کھیلتے ہوئے بولڈ ہوگئے۔شعیب ملک اور آل راونڈر فہیم اشرف کے جارحانہ کھیل کی بدولت بڑا ہدف دینے میں کامیاب رہے، ملک 14 گیندوں پر 37 اور فہیم 9 گیندوں پر 16 رنز بناکر ناٹ آوٹ رہے۔آل راونڈر حسین طلعت کو رمیز راجہ نے گرین کیپ پہنائی جبکہ آصف علی کو وقار یونس نے کیپ پہنائی۔جیسن محمد کا کہنا تھا کہ پہلی بار کپتانی کررہا ہوں اس لئے تھوڑا دباوہے ، ہماری ٹیم سینیئر اور جونیئر کھلاڑیوں پر مشتمل ہے۔ ویسٹ انڈیز کی اننگز کا آغاز چیڈ وک والٹن اور آندرے فلیچر نے کیا۔ آندرے فلیچر نے محمد نواز کو پہلی ہی گیند پر چھکا لگا کر خطرناک عزائم کا اظہار کیا لیکن چوتھی گیند پر محمد نواز نے انہیں آوٹ کردیا۔ محمد عامر نے دوسرے اوور میں پہلے آندرے فلیچر کو اور پھر جیسن محمد کوصفر پر آوٹ کیا۔ نواز اورعامر کی عمدہ بولنگ نے ویسٹ انڈیز کو سنبھلنے کا موقع نہ دیا اور مہمان ٹیم یکے بعد دیگرے60رنز پر پویلین واپس لوٹ گی۔سیموئلز18اور امرٹ11رنز بنا کر آوٹ ہوئے، کیموپال10رنز پر ناٹ آوٹ رہے، پارمول فیلڈنگ کرتے ہوئے زخمی ہوجانے کے باعث بیٹنگ کیلئے نہیں آسکے۔ڈیبیو کرنے والے حسین طلعت کو شاندار آل راونڈ کارکردگی پر مین آف دی میچ کا اعزاز دیا گیا۔ انہوں نے 41رنز کی شاندار اننگز کھیلنے کے علاوہ ایک وکٹ بھی حاصل کی اور 3خوبصورت کیچ پکڑے۔
