اسلام آباد...سابق وزیر اعظم نواز شریف نے کہا ہے کہ ریاست کے تینوں ستونوں پر ایک نے قبضہ کررکھا ہے۔ خلائی مخلوق اپنی مرضی کی پارلیمنٹ لانے میں مصروف ہے تاہم خلائی مخلوق میں اب وہ اثر نہیں رہا ۔عوام ہمارے ساتھ ہیں۔ احتساب عدالت کے باہر صحافیوں سے گفتگو کرتے ہوئے انہوں نے کہاکہ 2014 کے دھرنے سے متعلق میرے پاس کہنے کو بہت کچھ ہے ۔اس معاملے میں بہت حقائق ہیں جو مناسب وقت پر سامنے آجائیں گے۔انہوں نے کہا کہ سب کچھ ہونے کے باجود ن لیگ نے پارلیمان میں قانون پاس کراکر مجھے پارٹی صدر بنایا لیکن اس قانون کو اسٹرائیک ڈاون کرکے مجھے پارٹی صدارت سے ہٹا دیا گیا۔ کیا یہ عمل قانونی تھا؟۔ایک سوال پر انہوں نے کہا کہ سابق صد کا بیان اخباروں میں چھپا تو اس کا جواب دیا لیکن زرداری اپنے بیان سے پیچھے ہٹ گئے۔ اگر زرداری صاحب نے بیان نہیں دیا توبریکنگ کس کے کہنے پر چلائی گئی۔ نواز شریف نے کہا کہ چیئرمین نیب کہتے ہیں کہ پورے ملک میں نیب کا سورج چمک رہا لیکن نشانہ صرف مسلم لیگ (ن) کو بنایا جارہا ۔ سندھ میں نیب کی طرف سے سب کو استثنیٰ دیا جارہا ہے۔سابق وزیراعظم نے کہا کہ صحافت کے ساتھ ہمارا گلا بھی دبانے کی کوشش کی جا رہی ہے۔
مزید پڑھیں:ہمارا مقابلہ خلائی مخلوق سے ہے ،نواز شریف
