بحرالاحمراتھارٹی نے رواں برس سمندری تفریح کے لیے دو کمپینوں کو کشتی کرائے پر فراہم کرنے کے لائسنس جاری کیے ہیں۔
سعودی خبررساں ایجنسی ’ایس پی اے‘ کے مطابق سمندری تفریح کے لیے یاٹ کرایے پر دینے کے لیے ’ھاسکو سی ورکس‘ اور ’مراسی الاحلام ہوٹلنگ اینڈ ٹورازم‘ کمپنی کو کرائے پر مختلف نوعیت کی کشتیاں فراہم کرنے کی اجازت دی گئی ہے۔
أول ترخيصين جديدة في عام 2025؛ تمنحها #الهيئة_السعودية_للبحر_الأحمر لشركتي تأجير يخوت في المملكة، سعيًا لتنظيم أنشطة السياحة الساحلية والارتقاء بالخدمات المقدمة، وتقديم تجارب سياحية ساحلية استثنائية في #البحر_الأحمر pic.twitter.com/Q0d8dUe438
— الهيئة السعودية للبحر الأحمر (@RedSeaSaudi) April 9, 2025
قبل ازیں تین کمپنیوں کو اس شعبے میں لائسنس جاری کیا جاچکا ہے جس کے بعد سمندری تفریح کے لیے لائسنس یافتہ کمپنیوں کی تعداد 5 ہو گئی ہے۔ یاٹ کرایے پر دیے جانے سے سمندری تفریح کے خواہش مندوں کو کافی سہولت ہوگی جبکہ تفریح کے لیے آنے والوں کو بہتر سہولیات بھی میسر آئیں گی ۔
اتھارٹی کا کہنا ہے کہ سمندری تفریح کے لیے یاٹ کرایے پر فراہم کرنے والی کمپنیاں اس امر کی پابند ہوں گی کہ وہ مقررہ معیار کا ہر صورت میں خیال رکھیں۔ کرایے پر دی جانے والی لانچ میں سواریوں کے تحفظ کو یقینی بنایا جائے اور مقامی ضوابط پرعمل درآمد کیا جائے۔
واضح رہے جدہ میں گزشتہ برس سے سمندری تفریح کے لیے باقاعدہ طور پر کمپنیوں کو لائسنس فراہم کرنے کے لیے ضوابط مقرر کیے ہیں اور سمندری سیاحت کو بھی فروغ دینے کے لیے سرمایہ کاروں کو اس شعبے میں سرمایہ کاری کرنے کی ترغیب دی جا رہی ہے۔
